Осумтемина новоизбрани судии во скопска Апелација дадоа свечена изјава

Изборот на судиите во Апелацискиот суд Скопје беше прв избор за второстепен суд спроведен врз основа на методологијата изработена согласно новиот закон за Судски совет. Сепак, изборот беше проследен со низа реакции од експертската јавност кои беа поврзани со отстапувањата од конечната ранг-листа на кандидати

Осумтемина судии во Апелацискиот суд Скопје, кои беа избрани во ноември минатата година, денеска дадоа свечени изјави пред членовите на Судскиот совет.

Свечена заклетва дадоа четворицата судии од кривичната област – Габриела Гајдова, Александра Ристевска, Весна Димишкова и Осман Шабани и четворицата кои беа избрани за судии од граѓанската област – Александар Шопов, Ирена Костадинова Ангелова, Наталија Донева и Илир Сулејмани.

• Судскиот совет го екипира скопскиот Апелациски суд, избрани осум нови судии

Изборот на осумтемина судии во скопска Апелација беше прв избор за второстепен суд спроведен врз основа на методологијата изработена согласно новиот закон за Судски совет. Сепак, изборот беше проследен со низа реакции од експертската јавност кои беа поврзани со отстапувањата од конечната ранг-листа на кандидати.

Од коалицијата „Сите за правично судење“ тогаш реагираа дека Судскиот совет направил отстапувања од ранг-листата на кандидатите без соодветно образложение за секоја отстапка, односно засебно за секој кандидат.

• „Сите за правично судење“: При изборот на судиите во Апелација, Судскиот совет повторно отстапи од ранг-листата на кандидати без соодветно образложение

Во врска со изборот реагираше и судијката Оља Ристова од Кривичниот суд Скопје која беше една од кандидатите за судии од кривичната област во скопска Апелација. Таа беше треторангирана на конечната ранг-листа за избор на апелациски судии од кривичната област, но не го доби потребното мнозинство од членовите на Судскиот совет и не беше избрана за судија во Апелација. На гласањето доби осум гласа „за“, но не го доби потребното Бадентерово мнозинство, каде што двајца гласаа „за“, а тројца членови на Советот беа „против“. 

Дополнително, Ристова уште тогаш најави дека одлуката на Советот ќе ја обжали пред Врховниот суд по неколку основи, меѓу другото, и по основа на дискриминација по етничка припадност.

• Судскиот совет без образложение ги прескокна повисоко рангираните кандидати при изборот на судии во Апелација, реагира судијката Ристова

• Здружението на судии јавно да се произнесе за неодамнешниот избор на апелациски судии, бара судијката Ристова

Седницата за избор на апелациски судии беше во периодот кога со Судскиот совет претседаваше Сашко Георгиев.