„Тој може да стави крај на ова денес, ако одлучи да го стори тоа. И ние го повикуваме да го стори тоа и да ја напушти украинската суверена територија“, вели Остин
Американскиот секретар за одбрана Лојд Остин вели дека рускиот претседател Владимир Путин не е во позиција да бара од Украина да стави крај на војната.
„Тој не е во позиција да ѝ диктира на Украина што треба да направат за да се постигне мир“,
изјави денеска Остин за новинарите во седиштето на НАТО во Брисел, пренесува Ројтерс.
Рускиот претседател Владимир Путин денеска изјави дека Русија ќе го прекине огнот и ќе влезе во мировни преговори доколку Украина се откаже од своите амбиции да се приклучи на НАТО и кога ќе ги повлече своите сили од четирите украински региони кои Москва ги смета за свои.
Остин, пак, вели дека Путин може да стави крај на војната ако одлучи да го стори тоа.
„Тој имаше неколку стотици илјади војници ранети и убиени во оваа неправедна и неиспровоцирана инвазија. Тој може да стави крај на ова денес, ако одлучи да го стори тоа. И ние го повикуваме да го стори тоа и да ја напушти украинската суверена територија“,
рече Остин.
Во пресрет на мировната конференција во Швајцарија, на која Русија не беше поканета, Путин наведе низа услови кои се во целосна спротивност со условите поставени од Украина.
„Условите се многу едноставни. Штом Киев изјави дека е подготвен за таква одлука и ќе започне со вистинско повлекување на силите од овие региони, а исто така официјално објави дека се откажува од плановите за влез во НАТО, од наша страна, веднаш, буквално во истиот момент ќе стигне наредбата за прекин на огнот и почеток на преговорите“,
рече Путин наведувајќи го целосното повлекување на украинските сили од целата територија на регионите Донецк, Луганск, Херсон и Запорожје во источна и јужна Украина.
Украина експресно и категорично го отфрли предлогот на Путин. Имено, советникот на украинскиот претседател Володимир Зеленски, Михаило Подољак, во изјава за Ројтерс рече дека Украина нема да ги прифати условите за почеток на преговорите за завршување на војната што ги претстави рускиот претседател Владимир Путин.
Тој го отфрли предлогот на Путин оценувајќи дека тоа не е сериозен обид за постигнување мировен договор и дека не е релевантен за никакви преговори.