Опозициската коалиција бара институционална и професионална одговорност, „бидејќи станува збор за кршење на законот и висок ризик за здравјето“
Опозициската коалиција на Алијансата за Албанците и Алтернатива бара оставка од министерот за здравство Венко Филипче поради тоа што учествувал на операција на пациент без да носи заштитна опрема.
„Вчера бевме сведоци на скандалозен настан во Универзитетската клиника за неврохирургија во Скопје, каде што министерот за здравство учествуваше на операција на мозок со цивилна облека, без униформа, без маска, без ракавици, без хируршка капа… Едноставно од улица директно во операциска сала, со што се кршат сите основни протоколи и правила за одржување на стерилитетот и хигиената во операциската сала“,
се вели во соопштението на Алијансата за Албанците, од чии редови беше претходниот министер за здравство Арбен Таравари.
Од опозициската коалиција Алијанса/Алтернатива велат дека министерот за здравство со вакво однесување испраќа лоша порака.
„Првиот човек на белите мантили, со ваквото каубојско однесување, испраќа лоша порака и ја навредува професијата и најхуманите професионалци, го деградира звањето доктор, па дури и им пренесува лошо искуство на помладите генерации, – дека ако си министер за тебе не важат правилата. Ние, остро реагираме на овој скандалозен настан и бараме институционална и професионална одговорност, бидејќи станува збор за кршење на законот и висок ризик за здравјето и животот на пациентот. Бараме од министерот без двоумење да си замине, бидејќи ова ги надминува сите граници на нормалното, хуманото и професионалното“,
велат од АА/Алтернатива.