Претстојната учебна година за основците и средношколците, како што е одлучено, ќе почне, како и досега, на 1 септември 2023, а ќе заврши на 17 јуни 2024 година, наместо на 10 јуни, како што тоа беше случај години наназад. Летниот одмор ќе трае до 31 август. Пролетниот распуст, кој е новина, ќе трае во периодот од 29 април до 5 мај 2024 година
Учениците во основните и во средните училишта во следната учебна 2023/2024 година покрај зимски и летен, ќе имаат пролетен распуст, кој ќе трае во периодот од 29 април до 5 мај 2024 година, соопшти попладнево Министерството за образование и наука.
Ваквата одлука на предлог на Министерството била донесена на денешната седница на Владата, се наведува во соопштението од МОН.
Претстојната учебна година за основците и за средношколците, како што е одлучено, ќе почне, како и досега, на 1 септември 2023, а ќе заврши на 17 јуни 2024 година, наместо на 10 јуни, како што тоа беше случај години наназад. Летниот одмор ќе трае до 31 август.
Зимски одмор учениците ќе користат од 30 декември, а второто полугодие ќе почне на 22 јануари.
„На денешната седница, Владата, на предлог на Министерството за образование и наука, одлучи учебната година да почне на 1 септември а првото полугодие да заврши на 29 декември 2023 година. Од 30 декември учениците ќе користат зимски одмор, а второто полугодие почнува на 22 јануари. Во периодот од 29 април до 5 мај 2024 година учениците ќе бидат на пролетен распуст. Учебната година ќе трае до 17 јуни, а летниот одмор почнува на 18 јуни и завршува на 31 август 2024 година“,
се наведува во соопштението од МОН.
Инаку, денешната одлука во врска со почетокот, датумите за одвивањето на наставата и одморите за учениците за наредната учебна година е епилог на речиси двомесечените анализи што ги правеше Министерството за образование и наука.
На маса, како што во повеќе наврати информираше ресорниот министер Јетон Шаќири, беа три предлози на МОН – новата учебна 2023/2024 година да започне на 11 септември и да заврши до крајот на јуни. Вториот предлог беше да остане почетокот на вообичаениот датум 1 септември, а во текот на учебната година да има и краток пролетен распуст. Третиот предлог беше учебната година да почне на 1 септември и да заврши како и досега, на 10 јуни.
Според денешниот исход, Владата одлучила да го прифати вториот предлог, со вметнување на краткиот пролетен распуст.