Лошата работа е кога измислените светови стануваат партија и партијата влегува во парламентот за да ги брани наводно патриотските каузи, тврди професорот по историја на културата на софискиот Филозофски факултет
Бугарскиот културолог Александар Ќосев ги критикува ставовите на официјална Софија дека македонскиот јазик е дијалект на бугарскиот, додавајќи дека се работи за основни непознавања и застарени поими за нација и јазик.
„Оние што тврдат дека македонскиот јазик е дијалект на бугарскиот јазик, не се свесни за основните концепти: тие не знаат што е јазик или што е дијалект. Но, најлошото е што тие не го знаат ни она што го бранат како ‘бугарски јазик’. Тие користат застарени поими за јазик и нација, во кои обете не се создадени од луѓе, туку се дадени од Бога, израснати како марули на полињата на животот“,
напиша тој на својот Фејсбук профил.
Ќосев, кој е професор на Катедрата за теорија и историја на културата на Филозофскиот факултет на Универзитетот во Софија, понатаму вели дека првично размислувал да го објасни тоа, но, имајќи предвид дека традиционалната бугарска историографија, а во голема мерка и традиционалната бугарска лингвистика, се обвиткани со романтични митови, сфатил дека тоа ќе покрене објаснувања од, како што ги нарекува „специјалистите“.
„Затоа, само дефинитивно ќе кажам: границите на јазикот не се нешто дадено, исто како што не е даден и односот меѓу ‘јазикот’ и ‘дијалектите’, тие се дефинирани и се преуредуваат во врска со долгорочни конфликти, политички, геополитички и геокултурни војни“,
пишува Ќосев.
Тој додава дека истото се однесува и на границите и идентитетот на јазиците, кои на територијата – неговите граници се резултат на низа долгорочни историски процеси, на конфликти, на судир на интереси и на совпаѓања.
„Националните замисли често ги следат промените на овие факти и живеат во нивните измислени светови. Лошата работа е кога измислените светови стануваат партија и партијата влегува во парламентот за да ги брани наводно патриотските каузи“,
истакува бугарскиот професор во својот пост на Фејсбук.