Во однос на Бугарија, шефот на дипломатијата вели дека треба да се врати довербата во Договорот за добрососедство, бидејќи, според него, секој излегување од таа рамка е враќање во ситуација пред договорот
Во интерес на сите нас е да имаме попис и да направиме се што треба за тој да биде успешен, односно резултатите да има прецизна рефлексија на демократската реалност и тие да бидат прифатени, односно секој да им верува, изјави вечерва министерот за надворешни работи Бујар Османи, нагласувајќи дека во мултиетничко општество е многу важно граѓаните и заедниците да веруваат во пописните резултати,
Во гостување на ТВ 24, Османи посочи дека комбинираниот модел за попис е избран за поголема доверба и за вкрстена проверка на електронските бази со физичките посети на граѓаните.
„Постојат неколку форми на попис. Постои традиционален попис, кога одите со празен лист по домовите и ги потпишувате граѓаните, постои целосно електронски попис, кога воопшто не одите по домовите, туку со едно копче на тастатура ќе ви се вкрстат сите податоци и постои комбиниран модел, кој како основа ги зема електорнските бази и само ги проверувате дополнително со посета на домовите на граѓаните. Ние го избравме овој комбиниран модел за поголема доверба и за вкрстена проверка на електронските бази со физичките посети на граѓаните“,
рече Османи.
Според него, нормално е пописот да има улога и за дефинирање на политиките, но како што рече, кај нас и политиката се дефинира од пописот, што го прави посензитивен процесот.
Околу Договорот со Бугарија, Османи посочи дека тој е соодветната рамка која што ги решава разликите меѓу нас и Бугарија.
Тоа што треба да се направи, како што рече, е да се врати довербата во тој договор, бидејќи, според него, секој излегување од таа рамка е враќање во ситуација пред договорот, кога немаше никаква предвидливост во нашите односи.
„За жал, поради објективни и субјективни фактори, се изгуби довербата дека тој договор испорачува резултати. Јас лично и повеќето од нас сме убедени дека договорот е соодветната рамка која што ги решава разликите меѓу нас и Бугарија“,
изјави Османи.
Тој додаде дека Бугарија не ги спори идентитетски атрубути. Според министерот, нема потреба од никаков страв затоа што никој не може да го оспорува македонскиот јазик и идентитет и тоа го разјасниле со бугарските колеги по серијата средби во изминатиот период.