Османи за Меморандумот: Не смеат да се дозволат отстапки од мостот на пријателство што го изградивме

Министерот за надворешни работи Бујар Османи е убеден дека стратешки интерес на Република Бугарија е Северна Македонија да биде дел од Европската Унија и верува дека сите разлики ќе се надминат преку интензивна комуникација и преку продолжување на работата на комисијата.

Османи смета дека бугарскиот меморандум отстапува од принципите на кои се заснова Договорот кој е потпишан со Бугарија, а чија цел, како што наведе, беше токму тоа – да се создаде рамка, да се создаваат инструменти каде можат да се надминат разликите кои постојат меѓу двете земји низ децениите.

„Убеден сум дека пристапот е интензивирање на комуникацијата. Секогаш кога има јаз во комуникацијата, нешто друго го пополнува јазот, како недозразбирањата, предрасудите, различните надворешни влијанија, и тој се создава секогаш кога вие ќе прекинете со комуникација. Сметам дека најважно е сега да ја воспоставиме интензивната комуникација за да го намалиме јазот кој некој друг би можел да го пополни со друга агенда“,
рече Османи, одговарајќи на новинарско прашање, на денешната прес-конференција, на која ги презентираше приоритетите во надворешната политика за следните четири години.

Во разговор со шефот на бугарската дипломатија Екатерина Захариева договорена е поинтензивна динамика, преку средби на највисоко можно ниво, продолжување на работата на комисијата, разговори меѓу двете држави и надминувањето на разликите да бидат во рамките на инструментите кои ги предвидува Договорот за добрососедство.

Османи потенцира дека со Договорот за добрососедство се направи пресврт во односите меѓу двете земји и поради тоа не смее да се дозволи вакви отстапки од „важниот мост што сме го изградиле“.

Според него Комисијата треба да продолжи да работи и нејзините членови искрено да разговараат, надвор од стегите на политиката, врз основа на автентични историски податоци и да најдат начин на интерпретирање, како што веќе нашле за пет до шест важни историски фигури.