Тој посочи дека вчера во Министерството имал средба со амбасадорката на Република Србија на која јасно ѝ го потврдил ставот дека коспонзорирањето на резолуцијата не е однос кон Србија и кон српскиот народ, туку е однос кон едно злосторство кое е направено и за кое меѓународните судови веќе имаат констатирано дека е геноцид и дека негирањето и глорифицирањето на сторителите е продолжување на геноцидот во друга форма
Универзална човекова должност е да се осуди која било форма на геноцид, независно кои се сторителите, изјави денеска министерот за надворешни работи Бујар Османи кој рече дека е изненаден од реакциите по објавата дека Република Северна Македонија е меѓу 17 држави кои ја коспонзорираа резолуцијата на Обединетите нации за прогласување на 11 јули за меѓународен ден за сеќавање на геноцидот во Сребреница од 1995 година.
Како што нагласи Османи, одлуката за коспонзорство ја донел сам и тој како министер му дал инструкција на нашиот амбасадор во ОН да биде коспонзор и да ја поддржи резолуцијата.
Според него, не смее да се реагира на оваа тема бидејќи прашањето влегува во делот на негирање на геноцидот што е строго забрането.
„Не очекував реакции, дури сум малку и шокиран од реакциите на дел од граѓаните кои мислам дека се поттикнати од одредени политички партии. Не смееме да реагираме на оваа тема зашто ова прашање влегува во делот на негирање на геноцидот и тоа е строго забрането. Мислам дека овие реакции и интерпретации се жални бидејќи немам дилема дека кој било граѓанин во Република Северна Македонија нема да го осуди убиството во еден ден на над 8 000 цивили – деца, возрасни, кои биле истребени, иако со одлука на Советот за безбедност било прогласена безбедна зона“,
изјави Османи од седиштето на Бошњачкиот демократски сојуз каде што беше организирана панел-дискусија за коспонзорството на Македонија на резолуцијата на ОН за геноцидот во Сребреница која се очекува да се усвои денеска на Генералното собрание на Обединетите нации во Њујорк.
Тој потсети дека веќе има одлука на Меѓународниот суд на правдата што неделата во Сребреница ги има прогласено за геноцид и дека Македонија во 2010 година во парламентот има донесено декларација со која се поддржува Европската резолуција за прогласување геноцид во Сребреница.
Во однос на реакциите од Србија, Османи ја нагласи важноста од помирувањето и посочи примери од историјата кога државници се извиниле за жртви во конфликти и војни, меѓу другото посочувајќи ги Франција и Германија кои, рече, денес се најголемите пријатели „бидејќи се залечени раните со јасно зборување за тоа што се случило“, како и на мерките што ги презема Германија за сеќавање на холокаустот.
„Горд сум што Северна Македонија е дел од коспонзорирањето на резолуцијата. Тоа е единствен начин да се спречи повторување на таквото дело. Геноцидот не е само актот на истребување туку почнува со говор на омраза, а завршува со негово негирање. Затоа не смееме да бидеме дел од ниту една фаза од геноцидот. Би сакал тука до мене денеска да беше и министерот за надворешни работи на Србија, и на Босна и Херцеговина, и сите заедно да се помириме. Затоа што има две опции – или војување или помирување. Војните на Балканот завршија, единствена алтернатива ни е да се помириме, да ги залечиме раните и да се извини секој кој сторил дела спротивни на меѓународното и хуманитарното право, за да може да продолжиме понатаму како што тоа го направила Европската Унија“,
истакна Османи.
Тој посочи дека вчера во министерството имал средба со амбасадорката на Република Србија на која јасно и го потврдил ставот дека коспонзорирањето на резолуцијата не е однос кон Србија и кон српскиот народ, туку е однос кон едно злосторство кое е направено и за кое меѓународните судови веќе имаат констатирано дека е геноцид и дека негирањето и глорифицирањето на сторителите е продолжување на геноцидот во друга форма.
„Мислам дека е најдобро и за Србија да ја залечи оваа рана како што тоа го направија Германците и како што го направија сите народи. Секаде каде што има меѓународна судска одлука за злосторство против човештвото јас не правам поделби во однос на сторителите. Утре може ние да бидеме жртва или генерациите што доаѓаат по нас и затоа не смееме да останеме неми на злосторства од тој тип, туку, напротив, да ги објасниме, посебно пред децата во образовниот процес“,
рече министерот за надворешни работи.
Министерот на БиХ, Елмедин Конаковиќ, во видеообраќање на дискусијата ѝ се заблагодари на Северна Македонија за конспонзорирањето на резолуцијата, убеден дека прогласувањето на 11 јули за меморијален ден значително ќе придонесе за мирот и безбедноста на регионот.
На панел-дискусија учествуваа и претседателот на Бошначкиот национален совет Џевад Хот, граѓанската активистка Мерсиха Смаиловиќ и адвокатката Едина Зекировиќ-Фазлагиќ.