Тој на денешниот брифинг објасни дека од моментот на најавата дека ќе дојде бугарска делегација до одржувањето на настанот сè било анализирано во МНР и оцени дека нашата држава постапи најправилно во овој случај – со тоа што не спречи посета на државна делегација, но и со тоа што не присуствуваше на настанот и укажала дека провокација е името на клубот, а не неговото отворање
Тоа беше тенка линија на проценка. Мислам дека направивме добра проценка, дека јасно покажавме со тоа што не бевме таму дека тоа за нас е неприфатливо, дека сè помина без инцидент и покажавме дека тука не се загрозува ничие право, рече министерот за надворешни работи Бујар Османи во врска со отворањето на клубот на здружението „Иван Михајлов“ во Битола.
Тој на денешниот брифинг објасни дека од моментот на најавата дека ќе дојде бугарска делегација до одржувањето на настанот се било анализирано во МНР и оцени дека нашата држава постапила најправилно во овој случај:
„Не дозволивме да паднеме во замката да се даде легитимитет на алибито дека во нашата држава се кршат правата на бугарската заедница. Мојата улога како министер за надворешни работи е да го зачувам имиџот на државата пред светот како демократска држава, дека сите заедници ги уживаат сите права и сите граѓани и дека нема да дозволиме алиби на наративот дека се газат човековите права на која било заедница, вклучувајќи ја и бугарската“,
рече Османи.
Тој потенцира дека се работи за провокација, која е во однос на името кое е избрано за клубот, а не самото отворање.
„Не бевме дел од таа посета, не дека се отвора бугарски клуб, туку спорно беше името на тој клуб кој тука се смета за провокација и контроверзија. Ако не беше тоа име на клубот, ние ќе бевме заедно со бугарската делегација за да се прикаже дека сите заедници ги уживаат сите права на организирање“,
рече Османи.
Тој информира дека првично барањето било од потпретседателката на Бугарија, Јотова, да биде присутна на отворањето на клубот во Битола, а нашите институции имале информација дека ќе дојдат и Каракачанов, Захариева и други. Османи признава дека една од претпоставките била дека посетата токму на центар кој носи име на контроверзен лик може да се гледа како провокација. Односно, дека дел од присутните биле токму поради тоа, а други биле тука за да не дозволат досегашниот напредок и она што е постигнато да се урне, и притоа тука ја посочи посетата на бугарскиот премиер Кирил Петков, за кој рече дека подоцна било најавено дека ќе дојде.
„Мислам дека дел од присутните беа тука за да испровоцираат наша реакција, за да обезбедат алиби пред светот дека имаат право кога кажуваат дека се газат нивните права. Мислев и мислам дека тоа беше најважното прашање, да не дозволиве да се создаде алиби дека државата не ги почитува човековите права. И мислам дека која било друга одлука ќе беше погрешна. Не мислам дека сите присутни имаа таква намера, некои се вклучија за да не дозволат некои да го срушат она што го градевме“,
рече Османи.
Османи на денешниот брифинг откри дека пред настанот им укажал на бугарските претставници на овие реакции и им пренел, како што рече, биографија на личноста на Ванчо Михајлов и колку тоа ќе биде спорно, дека нема да се гледа добро на тоа.
„Но, навистина проценивме и донесовме одлука која е во интерес на нашата држава, за да дадеме јасна порака дека не е добро, но да не спречиме посета на државна делегација бидејќи тоа ќе беше погрешно“,
рече Османи.
Тој смета дека сега на бугарските претставници и на бугарската министерка за надворешни работи е да ѝ објаснат на меѓународната заедница и на светот зошто сметаат дека ваква личност треба да се промовира, особено по жестоките реакции на повеќе заедници во земјава, вклучувајќи ја и еврејската.