Шефот на дипломатијата се осврна и на динамиката на внатрешните реформи во државата нагласувајќи дека остануваме целосно посветени кон зајакнување на функционирањето на демократските институции и на владеењето на правото, области за кои сме свесни дека ќе бидат од клучно значење за натамошните чекори. Тој, меѓу другото, додаде дека спроведувањето на договорите од Преспа со Република Грција и за пријателство со Бугарија, преку дијалог базиран на меѓусебно почитување, во духот на европските вредности, се и ќе останат врвен приоритет на Македонија
Министерот за надворешни работи Бујар Османи денеска пред членовите на Комисијата за надворешни работи на Европскиот парламент (АФЕТ) во Брисел ги посочи предизвиците со кои Северна Македонија се соочила на патот кон Европската Унија. Како што посочи, на овој пат било неопходно да се донесат политички храбри одлуки, но она што преостанува, е да се убедат граѓаните дека проширувањето на Унијата е живо.
„По бројни предизвици на патот кон полноправно членство во Европската Унија и неверојатни 22 години од потпишувањето на Спогодбата за стабилизација и асоцијација, Република Северна Македонија минатата година направи историски исчекор и ги започна преговорите за пристапување во ЕУ, кои означуваат почеток на новата и квалитативно највисока фаза во односите со ЕУ пред полноправното членство. За остварување на оваа стратешка цел минатата година беше потребна политичка храброст и ние ја презедовме без двоумење во интерес на нашите сограѓани. Многумина дома се уште не се убедени дека ја донесовме вистинската одлука и наша заедничка цел треба да биде да ги увериме со дела дека проширувањето е живо и дека и нашите граѓани наскоро ќе имаат шанса да ја почувствуваат конкретната корист од трансформацијата која ни претстои“,
рече Османи на почетокот од своето обраќање.
Тој потсети дека во меѓувреме земјата успешно го започнала скрининг-процесот на европското законодавство.
„Меѓутоа, она што е особено важно за нас во периодот кој доаѓа и за што вие самите имате значајно влијание е што е можно поскоро да го добиеме скрининг-извештајот за Кластерот 1 – Темели од Европската комисија и да започне конкретната работа врз подготовка на трите патокази, за владеењето на правото, реформата на јавната администрација и функционирањето на демократските институции, како и на Акцискиот план за малцинства и заедници, кој го прифативме токму за да покажеме дека Северна Македонија има многу што да ѝ понуди на ЕУ, а не да скрие“,
рече Османи.
Шефот на дипломатијата се осврна и на динамиката на внатрешните реформи во државата нагласувајќи дека остануваме целосно посветени кон зајакнување на функционирањето на демократските институции и на владеењето на правото, области, за кои сме свесни дека ќе бидат од клучно значење за натамошните чекори. Тој, меѓу другото, додаде дека спроведувањето на договорите од Преспа со Република Грција и за пријателство со Бугарија, преку дијалог базиран на меѓусебно почитување, во духот на европските вредности, се и ќе останат врвен приоритет на Македонија.
„Во претстојниот период нашата Влада ќе вложи максимални напори за успешно спроведување на неопходните реформи, особено во делот на владеењето на правото, успешно завршување на скрининг-процесот и исполнување на условот од заклучоците на Советот на ЕУ од минатиот јули за спроведување на уставни амандмани со цел отворање на првиот кластер посветен на Темелите до крајот на 2023 и динамизирање на нашиот пристапен процес. Си поставивме амбициозна цел – Северна Македонија да биде да биде потполно подготвена да ги преземе обврските од членството во ЕУ до крајот на 2030 година. За ова да се оствари ни преостанува многу работа“,
подвлече Османи.
Тој испрати порака и „до бугарски пријатели дека обврските од Договорот и од двата протокола не се заборавени“.
„Лично ги надгледувам работните групи за реализација на зеамните обврски и наскоро ќе излеземе со резултати од нивната работа во делот на говорот на омраза, за рехабилитација на жртвите на репресиите на комунистичкиот период, за спроведување на усвоените препораки од работата на историската комисија, како и за заштита од дискриминација. Меѓутоа, истовремено бараме услови за водење на конструктивен и добронамерен дијалог базиран на меѓусебно уважување и почитување и од страна на Бугарија. Верувам дека набрзо со формирањето на новата Влада во Софија ќе успееме да го постигнеме тоа“,
порача министерот за надворешни работи.
Османи подвлече дека руската агресија врз Украина длабоко ja промени геополитичкaта реалност и Северна Македонија веднаш и недвосмислено се приклучи кон едногласната осуда на ЕУ и меѓународните партнери за неоправданата и неиспровоцираната агресија врз суверена земја и согласно своите можности пружи хуманитарна, воена и дипломатска помош.
Тој упати порака и до европратениците дека новата комплексна геополитичка реалност ја зајакна потребата од зголемен фокус и анганжман на ЕУ во регионот на Западен Балкан со динамизирање на ЕУ пристапниот процес, што ќе придонесе за унапредување на демократскиот развој, стабилноста и просперитетот на општествата и сите наши граѓани.