Амбасадата во Берн e една од најоптоварените амбасади во Европа во кои има базна станица. Како и во нашите дипломатско-конзуларни претставништва во Брисел, Бон и во Берлин, и амбасадата во Берн ја реаорганизираше својата работа во конзуларниот дел – кажа министерот за надворешни работи, Бујар Османи
По вчерашната посета на дипломатско-конзуларното претставништво во Бон, Германија, од каде министерот за надворешни работи Бујар Османи се пофали дека донел дополнителна станица за фотографирање и издавање пасоши, денеска тоа го направи и за потребите на македонската амбасада во Берн, Швајцарија, која важи за една од најоптоварените амбасади во Европа во кои има базна станица за сликање и издавање патни исправи за македонските државјани.
Османи кажа дека дошол во Берн за да ги охрабри дипломатите кои даваат услуги на околу триста македонски државјани на дневно ниво, но и за лично да се увери како тече процесот на издавање нови патни исправи.
„Донесов уште една мобилна станица за фотографирање, што значи дека и овде во Берн работиме со два пункта паралелно, што значи два тима паралелно фотографираат и врачуваат нови патни исправи”,
рече Османи.
Дополнително, вели тој, како и во Брисел, Бон и во Берлин, каде тој ги посети дипломатско-конзуларните претставништва, така и во Берн, работата во конзуларниот дел е реорганизирана за да се скрати времето на давање услуги на граѓаните во најбрз можен рок.
„Предизвиците продолжуваат секаде поради вонредната ситуација. Олеснувачки фактор претставува одлуката на Швајцарија да им дозволи на нашите државјани патување и со старите патни исправи. Како и да е, сме се реорганизирале со дополнителни дипломати, работа во две смени и работа за време на викенд”,
вели Османи.
Од Швајцарија, Османи продолжува со посетите на дипломатско-конзуларните претставништва, а следна за посета е Венеција, Италија.