Усвојувањето на писмото за што информира Османи, доаѓа истовремено со Извештајот на Европската комисија за напредокот на С Македонија за 2023 година. Во него Комисијата нотира бројни забелешки токму во делот на владеењето на правото, конкретно во судството и умерена подготвеност за реформи во јавната администрација, кои се дел од Кластер 1 – Темели
Шефот на дипломатијата Бујар Османи со објава на Фејсбук која почнува со зборовите – „Добра вест од Брисел“ информира дека вчера Советот на Европската Унија го усвоил писмото со кое С Македонија е поканета да ги подготви Патоказите за владеењето на правото и за реформа на јавна администрација за отворање на Кластер 1 – Темели (Fundamentals).
„Уште една успешно завршена обврска која нѐ носи поблиску до отворање на кластерите и поглавјата, во насока на забрзана ЕУ-интеграција“,
пишува Османи во објавата.
Усвојувањето на писмото, за што информира Османи, доаѓа истовремено со Извештајот на Европската комисија за напредокот на С Македонија за 2023 година. Во него, Комисијата нотира бројни забелешки токму во делот на владеењето на правото, конкретно во судството и умерена подготвеност за реформи во јавната администрација.
Европската комисија забележува дека ограничен напредок е постигнат во периодот на известување со усвојувањето на новата стратегија за реформа на јавната администрација и придружниот акциски план во јули 2023 година.
„Откако го започна процесот пред пет години, земјата сè уште не ја усвои ревидираната законска рамка за управување со човечки ресурси, која ги вклучува ревидираниот Закон за административни службеници, Законот за вработените во јавниот сектор и новите законски одредби за управување на највисоко ниво. Новата рамка треба да го подобри управувањето со човечките ресурси низ администрацијата и да помогне да се обезбедат вработувања, унапредувања и отпуштања врз основа на заслуги на сите нивоа, вклучително и високото раководство“,
стои во Извештајот за напредокот на земјава.
Во областа на судството, најновиот извештај на ЕК нотира дека С Македонија нема постигнато никаков напредок. Се посочува дека препораките на Комисијата од минатата година не се имплементирани и натаму остануваат да важат.
Во извештајот, Комисијата го оценува како контроверзно разрешувањето на претседателката на Судскиот совет, посочувајќи дека ова тело треба да се спротивстави на секое надворешно влијание и да се залага за заштита на интегритетот и независноста на судиите. Во оваа насока, останува препораката за ревидирање на законодавната рамка и целокупното функционирање на Судскиот совет со цел јакнење на неговата транспарентност и независност.
Во извештајот, Комисијата посочува дека доцни и усвојувањето на новата стратегија за реформи во судството која треба да има за цел да ги подобри перформансите на институциите.
Европската комисија нотира дека Северна Македонија не постигнала напредок ниту во областа на превенција и борба против корупцијата. Комисијата го оценува како загрижувачки прашањето што корупцијата и натаму останува распространета во многу области. И во овој дел, како и во областа судство, Комисијата посочува дека „земјата е помеѓу одредено и умерено ниво на подготовка во превенцијата и борбата против корупцијата“.
„Кривичниот законик беше изменет по забрзана собраниска процедура, а максималните казни за конкретни кривични дела поврзани со корупција беа намалени, што имаше импликации за примената на застареноста и влијаење, запирање или дури прекинување, а голем број случаи на корупција на високо ниво, вклучително и од поранешната Специјално јавно обвинителство (СЈО). Измените, исто така, ја попречуваат способноста на властите да ги истражат и гонат таквите прекршоци. Ова е прашање на сериозна загриженост“,
се вели во извештајот.