Меѓу централните теми на средбата на шефот на дипломатијата со австрискиот колега биле предизвиците на руската агресија врз Украина, но и нестабилноста во целиот ОБСЕ регион, како и претседавањето на С Македонија со организацијата
Потпишувањето на Договорот со Фронтекс е суштинска додадена вредност за справување со илегалната миграција, порачал шефот на дипломатијата Бујар Османи на состанок кој денеска во Виена го одржал со австрискиот министер за европски и меѓународни прашања Александар Шаленберг.
На состанокот, соопштија од кабинетот на Османи, била потенцирана улогата на Северна Македонија која успешно се справува со миграциските текови кои се дел од т.н. балканска рута.
„Потпишувањето на Договорот помеѓу Европската Унија и Република Северна Македонија за оперативни активности спроведени од Агенцијата на ЕУ Фронтекс, со кој се воспоставуваат одржливи и трајни решенија во справување со илегалната миграција и прекуграничниот криминал претставува суштинска додадена вредност во справувањето со мигрантската криза. Како и порано, ние остануваме партнери и на Европската Унија, но и посебно на земјите од нашето пошироко регионална опкружување со цел справување со каква било можна ескалација на овие состојби“
истакнал Османи кој се заблагодарил за учеството на австриските полицајци на заедничката меѓународна акција, поддржана од Европската Комисија, за заштита на нашата јужна граница.
Покрај за миграциската криза во фокусот на разговорите биле и актуелните случувања во ОБСЕ регионот, како и за приоритетите на претседавањето со Организацијата од страна на Северна Македонија следната 2023 година. Централна тема, додаваат од МНР, биле предизвиците на руската агресија врз Украина, но и нестабилноста во целиот ОБСЕ регион, другите конфликти и идната улога на Организацијата.