Според Османи ова е важна работа посета на Германија каде се разговарало и за предизвиците наметнати од руската агресија во Украина и блокираната европска перспектива на регионот
Министерот за надворешни работи Бујар Османи, за време на својата работна посета на Германија, покрај средбата со Антон Хофрајтер, претседател на Комисијата за ЕУ прашања во Бундестагот, денеска се сретнал и со Михаил Рот, претседател на Комисијата за надворешни работи, информираше Османи на социјалните мрежи.
„Средба со мојот почитуван пријател Михаил Рот, претседател на Комисијата за надрворешни работи во Бундестагот. Во фокусот на разговорите – неопходноста за одлучни чекори од страна на ЕУ во однос на европската интеграција на државите од Западен Балкан во светло на новите геополитички ризици кои го демнат и регионот. Германија продолжува да биде гласен и цврст поддржувач на нашиот европски пат“,
напиша Османи на Фејсбук.
Како што информираат пак од МНР, шефот на нашата дипломатија во изјава од Берлин, оценува дека ова е важна работна посета на Германија каде што разговарале за предизвиците наметнати од руската агресија во Украина и блокираната европска перспектива на регионот, како извор на системска ранливост.
„Ги информирав германската Влада и германскиот Бундестаг за чекорите кои ги презеде Република Северна Македонија за да постигне стопроцентна усогласеност со надворешната и безбедносна политика на ЕУ и со тоа покажа зрелост, но и доследност како партнер на Европската Унија, но и НАТО-член во регионот, а секако ја информирав Владата и Парламентот за текот на разговорите со Република Бугарија. Притоа констатирајќи дека е време Република Бугарија да покаже стратешко лидерство со цел да се прекине овој токсичен круг на односи којшто се провлекува со години и остава трајни последици помеѓу граѓаните од двете страни на границата, а секако и ЕУ да презема стратешко лидерство кон регионот заради тоа што овие историски моменти го наметнуваат токму тоа“,
изјавил Османи
За време на работната посета на Берлин, Османи, попладнево, ќе има средба и со државната министерка надлежна за Европа, Ана Лирман.