Се надеваме дека нашата одлука за прогласување на еден руски дипломат за персона нон грата нема да влијае врз односите меѓу Северна Македонија и Русија, изјави денеска министерот за надворешни работи Бујар Османи. Одлуката за протерување на дипломатот, како што образложи Османи, била донесена поради однесувањето, кое е неспоиво со дипломатскиот статус и правила.
„Врз основа на сериозна истрага на случајот, донесена е одлука тој да ја напушти земјата во рок од 7 дена“,
изјави Османи.
Шефот ма македонската дипломатија изјави дека засега нема најава за реципрочна мерка од руска страна, но, како што нагласи, секоја држава има инструменти и можност да преземе теков чекор.
„Оваа одлука не е поврзана со нашите односи со Руската Федерација, иако се случува во услови кога се солидаризираме со нашите сојузници во врска со некои однесувања на Русија“,
додаде Османи.
Според него, во јавноста се отвора лажна дилема дали сме со САД или со Русија, бидејќи таа одлука државата ја има донесено уште од првите години на независноста, со Резолуцијата во Собранието од 1993 година за членство во НАТО.
Тој нагласи дека со членството во НАТО нашата позиција на меѓународната сцена е значително променета и партнерството со 29 други земји се гради со јасна партиципација и придонес за почитување на принципите на тоа сојузништво.
Руското Министерство за надворешни работи денеска соопшти дека Русија ќе преземе соодветни чекори како одговор на протерувањето на рускиот дипломат од Северна Македонија.
„Најостро ги осудуваме таквите неосновани потези кои дефинитивно ќе влијаат на односите меѓу Русија и Северна Македонија. Ќе следува одговор“,
наведе руското МНР во соопштението.
Македонското МНР во вторникот соопшти дека согласно член 9 од Виенската конвенција за дипломатски односи, еден дипломат на руската амбасада во Скопје е прогласен за непожелна личност во Северна Македонија. Нотата со која се наложува дипломатот да ја напушти територијата на Северна Македонија во рок од седум дена му била предадена на рускиот амбасадор во Скопје ,Сергеј Баздникин во МНР на 14 мај.