Вицепремиерот за европски прашања Бујар Османи денеска имал средба со евроамбасадорот Самуел Жбогар, прва по парламентарните избори на 15 јули.
„На земјата ѝ е потребна стабилна и функционална влада, со европска перспектива, која ќе може адекватно да се подготви и да ги започне претстојните преговорите со Европската Унија, како и да биде гарант за регионалната стабилност“,
порача Османи на Фејсбук по средбата со евроамбасадорот.
Со соопштение излегоа и од Секретаријатот за европски прашања од каде што додаваат дека вицепремиерот изразил задоволство од постигнатиот консензус во ЕУ за повеќегодишната финансиска рамка и го поздравил зголемувањето на средствата предвидени за земјите од Западниот Балкан за 10 отсто. Тоа, како што истакнал Османи, само ја потврдува констатацијата дека Западниот Балкан сè повеќе се интегрира и сè повеќе станува внатрешно прашање на Унијата.
Вчера Жбогар и амбасадорката на САД, Кејт Брнз, пак, имаа средба со вицепремиерката и министерка за одбрана Радмила Шекеринска, министерот за надворешни работи Никола Димитров и националниот координатор за евроинтеграции Бојан Маричиќ. Како што наведоа од МНР, на средбата се разговарало за резултатите од изборите и било посочено дека тие беа успешно спроведени и претставуваат голема потврда на европскиот и евроатлантскиот пат.