Позитивната е што бугарската страна ги прифаќа предлозите од патоказот, но негативната страна е дека писмото стигнало по завршувањето на самитот со што нема одлука за почеток на преговорите, како клучен елемент од целосното решение
Писмото од бугарскиот министер за надворешни работи го гледам како дефинирање на патоказот кој е еден од трите елементи за заокружување на решението кое ќе ги отвовори преговорите на С Македонија со ЕУ, вели министерот за надворешни работи Бујар Османи, коментирајќи го писмото кое бугарскто МНР вчера објави дека му го испратил Светлан Стоев на македонскиот колега.
Османи денеска појасни дека целта на посетата на Софија на 17 јуни е дефинирање на тој патоказ кој треба да биде вметнат во европскиот предлог.
„Треба да има решение, патоказ и одлука за почеток на преговори. Нема договор доколку некој од овие елементи недостасува“,
рече денеска Османи.
Тој смета дека писмото што го добил има една позитивна и една негативна страна. Позитивната е што бугарската страна ги прифаќа предлозите од патоказот, но негативната страна е дека писмото стигнало по завршувањето на самитот со што нема одлука за почеток на преговорите, како клучен елемент од целосното решение.
Тој најави дека во нардениот период ќе продолжат разговорите за во септември да има зелено светло и договор.
За патоказот рече дека е исто што и Акцискиот план во Догворот за пријателство и соработка со Бугарија на билатерално ниво, но во европски рамки, откако по барање на Бугарија е воспоставен европски мониторинг на спроведување на Договорот, покрај билатерланиот. Во тој контекст ЕУ побарала да се изготви патоказ од двете земји кои тие ќе одлучат каде ќе биде сместен.
Бугарското Министерство за надворешни работи вчера попладне објави список на обврски што, наводно, ги прифатила македонската страна, за време на состаноците во Софија на 17 овој месец.
Како што се наведува во соопштението на бугарското МНР, за време на средбите на премиерот Зоран Заев, на 17 јуни 2021 година во Софија, со претседателот Румен Радев и премиерот Стефан Јанев, како и во разговорите меѓу министрите за надворешни работи Светлан Стоев и Бујар Османи, Република Северна Македонија изрази подготвеност да ги исполни следниве обврски:
-Скопје што побрзо да потврди до ООН, во согласност со чл. 11 ст. 3 од Договорот за добрососедство дека краткото и долгото име на земјата се однесуваат само на политичкиот субјект „Република Северна Македонија“, а не на географскиот регион „Северна Македонија“, чиј дел се наоѓа во рамките на суверените граници на Бугарија. По испраќањето на оваа вербална белешка, Бугарија веднаш ќе престане да инсистира на употреба само на долгото име „Република Северна Македонија“ во ЕУ и во меѓународните организации;
-Република Северна Македонија конечно да ги повлече своите малцински претензии кон Бугарија, потврдувајќи дека не постојат историски, етнички и други основи за барање статус на малцинство за која било група на луѓе кои не се нејзини државјани на територијата на Република Бугарија. Ова би било во согласност со клаузулата за немешање во внатрешните работи на Бугарија, утврдена во чл. 11 ст. 5 од договорот од 2017 година;
-Република Северна Македонија да започне процес на рехабилитација на жртвите на југословенскиот комунизам, репресирани на нејзината територија поради нивната бугарска самосвест. Овој историски гест од страна на Република Северна Македонија во пракса би го одразувал нашиот заеднички европски цивилизациски избор;
-Република Северна Македонија да ја прилагоди со Бугарија содржината на нејзините наставни програми, со цел објективно да ја рефлектира нашата заедничка историја, поставена како централен елемент во преамбулата и од Договорот за добрососедство, како и со цел елиминирање на образовните содржини што поттикнуваат омраза кон Бугарија (чл. 11 ст. 6);
-Идентификување заедно со Бугарија и отстранување на знаци и натписи на територијата на Република Северна Македонија, што предизвикуваат омраза кон Бугарија и Бугарите.
Премиерот Зоран Заев пред два дена, на прес конференцијата со албанскиот премиер Еди Рама во Скопје рече дека за време на посетата на Софија, ја исполниле обврската од предлогот на португалското претседателство да достават патоказ со конкретни датуми и обврски на институциите во буквално сите области на соработка и дека не се обврзале на ништо досега непознато, и дека идентитетот и јазикот не се на преговарачка маса.