Наша задача е да бидеме оптимисти и да работиме за подобра иднина, а напорите што ги правиме како Влада ги темелиме на плебисцитарната желба на граѓаните за ЕУ и сѐ додека постои таква консензуална желба, нема пречка што може да нѐ застане на тој пат, изјави денеска во Битола министерот за надворешни работи Бујар Османи во врска со актуелната состојба околу евроинтеграциите.
„Денес имаме пречка од Бугарија, утре ќе имаме пречка од некоја друга држава – членка на ЕУ, но овој процес бара консензус, бара напорна работа, бара умешност, стратегија, дипломатија и трпение во одредени моменти, затоа што е заснован на консензуалната определба на граѓаните. Нема алтернатива од членството во ЕУ, нема алтернатива од добрите односи со Република Бугарија и со соседите, и тука го базираме оптимизмот“,
изјави Османи најавувајќи дека претстои тежок процес на преговори.
Сепак, рече дека и покрај ваквата ситуација, владините активности продолжуваат со ист интензитет.
„Ние не изгубивме ниту еден час по донесената одлука која, за жал, ќе ја ослаби европската идеја во регионот и им штети и на Република Северна Македонија, Република Бугарија, но и на целата европска идеја во регионот. Но, продолжуваме да работиме затоа што сметам дека уште има простор, влогот е голем, а последиците би биле лоши доколку се намали перспективата на државата и на регионот, а со тоа ќе ослаби идејата на ЕУ на Балканот“,
рече Османи изразувајќи надеж дека со внатрешна кохезија и со внимателно негување на односите со Република Бугарија ќе се постигне напредок по ова чувствително прашање.