Османи од Букурешт ќе отпатува за полскиот град Лоѓ, каде што ќе учествува на 29-от Министерски совет на ОБСЕ, по кој Северна Македонија го презема претседателството со Организацијата
Поддршката за Украина, политиката на отворени врати на НАТО, зајакнувањето на источното крило на Алијансата, како и значењето на регионот на Црното Море за целокупната трансатлантска безбедност, беа во фокусот на дискусиите на вториот ден од министерскиот состанок на НАТО во Букурешт, на кој учествува и министерот за надворешни работи Бујар Османи, информираат од МНР.
На состанокот на кој присуствуваат и министрите за надворешни работи на Финска, Шведска, Босна и Херцеговина, Грузија и Молдавија, беше изразена поддршка за Украина, а воедно стана збор и за заканите и предизвиците од авторитарните актери и стратешките конкуренти на НАТО во повеќе региони, вклучувајќи го и Западниот Балкан.
Во своето обраќање, Османи нагласи дека Северна Македонија како дел од Западен Балкан и најнова членка на НАТО, одблиску ја познава трансформативна моќ на европската и евроатлантската интеграција и токму затоа силно ја поддржува политиката на отворени врати на Алијансата и процесот на проширување на Европската Унија. Според него, за време на војна на европскиот континент, европските и евроатлантските интеграции на земјите од Западен Балкан се клучни за одржување долгорочна регионална и европска стабилност.
„Денес, заедно со министрите за надворешни работи на Босна и Херцеговина, Грузија и Молдавија, како најмногу погодени земји од војната во Украина, имаме можност да размениме мислења за тоа како дополнително да ја зајакнеме нивната отпорност и да ги развиеме нивните капацитети, поддржувајќи ја нивната политичка независност. Западен Балкан и Црното Море остануваат региони од стратегиско значење за Алијансата. Нашето партнерство е клучно во справување со заедничките закани и предизвици“,
додаде Османи.
Од Букурешт Османи ќе отпатува за полскиот град Лоѓ, каде што ќе учествува на 29-от Министерски совет на ОБСЕ, по кој Северна Македонија го презема претседателството со Организацијата.