Состанокот ќе се одржи во видео формат, а со него ќе претседава германскиот министер за надворешни работи, Хајко Мас
Шефот на дипломатијата Бујар Османи утре ќе учествува на министерскиот состанок за надворешни работи во рамки на германското претседателство со Берлинскиот процес во 2021 година. Состанокот ќе се одржи во видео формат, а со него ќе претседава германскиот министер за надворешни работи, Хајко Мас.
Покрај Османи, како што соопшти МНР, на состанокот ќе учествуваат неговите колеги од земјите учесници во процесот од Западен Балкан – Албанија, Босна и Херцеговина, Косово, Србија и Црна Гора и земји членки на ЕУ, Aвстрија, Бугарија, Грција, Италија, Полска, Словенија, Франција, Хрватска, како и Обединетото Кралство.
Донесените заклучоци од состанокот би требало да влезат во завршната декларација на завршниот самит на шефови на држави и влади, кој е планирано да се одржи на 5 јули годинава.
Берлинскиот процес е инициран во 2014 година, под покровителство на германската канцеларка Ангела Меркел, како политичкa платформа за политички дијалог на високо ниво помеѓу високите претставници на шесте земји од Западен Балкан и нивните колеги од земјите членки на ЕУ, домаќини на Берлинскиот процес, како и за продлабочување на регионалната, политичка и социо-економска соработка. Процесот е насочен кон постигнување забрзан реформски напредок и економски развој во комплементарност со ЕУ пристапниот и интегративен процес.