Очигледно уставните измени не влегуваат во прашања што ги загрозуваат интересите на граѓаните. Да се договориме за основните принципи што би го дефинирале односот до членство во ЕУ, независно кој е на власт. Тоа е единствениот начин да не создаваме меѓусебни кочења. Ова е само еден предлог, но ако се седне на маса, може да излезат десетици други предлози со кои ние ќе ги надминеме сопствените суети, вели Османи
Има простор за да најдеме заеднички јазик со опозицијата во однос на грижите што може да ги има кон евроинтегративниот процес. Ќе биде државнички чекор доколку смогнеме сили и го тргнеме овој проблем и мислам дека тоа ќе ослободи еден сериозен потенцијал на државата и внатре и на меѓународна сцена, вели министерот за надворешни работи Бујар Османи во интервју за „Слободен печат“.
Во однос на барањето на опозицијата за предвремени избори кои би се одржале наппролет, Османи посочува дека е некоректно кон граѓаните едно важно прашање, како што е евроинтегративниот процес, да се става во трансакциски однос со избори.
„Не е фер да им кажете – јас ќе ви ја кочам иднината ако вие не ми дадете власт, ви ги терам вашите деца иднината да ја бараат надвор, да не можете да си планирате иднина овде зашто ние сметаме дека ние треба да бидеме на власт. Мислам никој не би се осмелил вака да им каже на граѓаните, а изгледа дека суштината е тоа“,
нагласува министерот за надворешни работи.
На прашањето дали се почнати консултации со сите политички партии за уставните измени, Османи вели дека досега се се сведува на разговори по ходници.
„Веќе од наредната недела мора да се формализира процесот на консултации. Досега сè е на разговори по ходници, но треба да почнат јавни дебати во кои ќе се вклучат експерти, политичари невладини организации… пред сè во парламентот. Да видиме кои се ризиците, кои се аргументите, а и Владата да направи формален исчекор со седнување на маса со сите на тема уставни измени и евентуални разговори за вин-вин решение. Јас имам некои идеи“,
вели шефот на дипломатијата не прецизирајќи какво е тоа вин-вин решение за кое говори.
Вин-вин е решение што ќе ги има предвид сите грижи на страните во процесот по однос на овој дискурс со Бугарија, додава тој.
На прашањето дали Владата е подготвена да им даде нешто на опозиционерите ако сака да успее овој процес, Османи вели:
„Власта и опозицијата може да се договараат за основните принципи по кои ќе се одвиваат преговорите до членство во ЕУ, со цел да се заштитат интересите на граѓаните, како и во однос кон Бугарија. Очигледно уставните измени не влегуваат во прашања што ги загрозуваат интересите на граѓаните. Да се договориме за основните принципи што би го дефинирале односот до членство во ЕУ, независно кој е на власт. Тоа е единствениот начин да не создаваме меѓусебни кочења. Ова е само еден предлог, но ако се седне на маса, може да излезат десетици други предлози со кои ние ќе ги надминеме сопствените суети, партиските интереси, личните амбиции и еднаш да направиме нешто во интерес на државата“.
Во однос на обвинувањата од јавноста за сервилност на Владата кон Бугарија, министерот посочува дека сервилноста се проценува во однос на нивните изјави и реакции и дека решението не е да се влезе во реторичка војна со Бугарија.
„Ние можевме да влеземе во една реторичка војна со Бугарија. Сервилноста се проценува во однос на нашите изјави, реакции. Никогаш не сум сакал да има став на кој било од меѓународната заедница во кој ќе се каже за двете страни, бидејќи не бевме двете страни еднакво виновни за овој процес. Мене и на други членови на Владата сигурно ќе ни беше полесно заради рејтинг и популарност во јавноста да влеземе во таков дискурс со Бугарија. Тие една изјава, ние три, па тие пет… Ако гледаме личен и партиски интерес, нам најмногу ни одговараше да влеземе во таков однос со Бугарија и, верувајте, ќе бевме херои, посебно кај македонските граѓани. Но, тоа се краткорочни херои, кои си пумпаат балони полни, кои ќе пукнат во прв момент. Ние го немавме тој став. Пред меѓународната заедница покажавме дека ние сме конструктивните, рационалните во процесот и таков беше односот кон нас. Не жалам во ниеден момент за изборот како да се однесуваме во јавниот простор со Бугарија. А во однос на суштинските прашања, не попуштивме ниту милиметар“,
нагласува Османи.