Министерот за надворешни работи Бујар Османи оценува дека треба постојниот или новиот закон за здруженија и фондации што го подготвува министерството за правда да се испрати на оценка во Венецијанската комисија, откако вчера во интервју за „360 степени“ министерот Никола Тупанчевски кажа дека новиот закон ќе биде испратен во нацрт-фаза, односно пред да биде пуштен во собраниска процедура. Според шефот на дипломатијата, важно е мислењето на Венецијанската комисија единствено во делот на ретроактивноста на законот, без разлика која верзија на законот ќе биде испратена на оценка, за како што вели „да не дозволиме алиби на било кој да удира по нашиот имиџ пред светот“.
„Гледајќи ја атмосферата во Софија, гледајќи што се случува во Советот на Европа и во други институции, сметав дека ќе ни обезбеди одличен аргумент ако го пратиме законот во Венецијанска комисија , добиеме потврда и од таму и ќе кажеме дека имаме експертско меѓународно мислење дека нема ништо спорно и така ќе ги спречиме сите можни кампањи против нас што можат да се случат. Но еве го слушнав министерот за правда вели – да донесеме нов закон. Уште подобро ако донесеме нов закон , тој закон е добро да го пратиме во Венецијанска комисија за да ги имаме аргументите, бидејќи оваа битка ќе продолжи“
потенцира Османи.
Во гостување во емисијата „360 степени“ министерот Тупанчевски најави дека пред Венецијанската комисија ќе биде испратен целосно новиот Закон за здруженија и фондации, кој во моментов е во изработка, а не неодамна изменетиот закон кој веќе стапи на сила.
„Разговаравме неформално со министерот Османи во однос на измените и дополнувањата на Законот за здруженија и фондации. И дефинитивно една од работите која беше спомната во разговорот беше една одредба од законот која малку мириса дека има ретроактивно дејство или ретроактивен карактер“,
рече Тупанчевски.
А одредбата што за министрите е спорна, веќе е на сила. Собранието без ниту еден глас „против“ ги усвои измените и дополнувањата кои забрануваат користење на имиња на личности во назив на здруженија на граѓани и фондации поврзани со расна, верска, национална и друга нетрпеливост, омраза, геноцид, ширење на или поддршка на фашизам. Забраната важи и за субјекти кои веќе се регистрирани, што значи дека законот има и ретроактивно важење.Сите здруженија во земјата, со измените на законот, имаат обврска во рок од 90 дена да го усогласат својот назив согласно новите одредби. Ако не го сторат тоа, во крајна линија, им се заканува бришење од Централниот регистар.