Измените на Законот за здруженија и фондации, кои беа донесени со 67 гласа „за“ и ниту еден „против“ и „воздржан“, а беа иницирани по формирањето на клубовите на здруженијата „Ванчо Михајлов“ во Битола и „Цар Борис Трети“ во Охрид, нема да бидат испратени на разгледување пред Венецијанската комисија
Пред Венецијанската комисија ќе биде испратен целосно новиот Закон за здруженија и фондации, кој во моментов е во изработка, а не неодамна изменетиот закон кој веќе стапи на сила, изјави министерот за правда Никола Тупанчески за „360 степени“. Новиот закон ќе биде испратен во нацрт-фаза, односно пред да биде пуштен во собраниска процедура. Првиот човек на правда вели дека на тој начин државата може многу повеќе да се заштити доколку некоја одредба е спорна.
А одредбата што е спорна веќе е на сила. Собранието без ниту еден глас „против“ ги усвои измените и дополнувањата кои забрануваат користење на имиња на личности во назив на здруженија на граѓани и фондации поврзани со расна, верска, национална и друга нетрпеливост, омраза, геноцид, ширење на или поддршка на фашизам. Забраната важи и за субјекти кои веќе се регистрирани, што значи дека законот има и ретроактивно важење.
Токму членот од законот кој предвидува и постоечките здруженија и фондации да го усогласат своето име со новите одредби во рок од 90 дена, наиде на различни толкувања во Владата. Министерот Османи не само што изрази сомнеж кон одредбата, туку токму од Софија најави дека ќе се размисли решението да оди пред Венецијанската комисија.
Но, дали за тоа се конслутирал со Тупанчески?
„Разговаравме неформално со министерот Османи во однос на измените и дополнувањата на Законот за здруженија и фондации. И дефинитивно една од работите која беше спомната во разговорот беше една одредба од законот која малку мириса дека има ретроактивно дејство или ретроактивен карактер“,
рече Тупанчески.
Измените беа донесени со 67 гласа „за“ и ниту еден „против“ и „воздржан“, а беа иницирани по формирањето на клубовите на здруженијата на граѓани „Ванчо Михајлов“ во Битола и на „Цар Борис Трети“ во Охрид.
Сите здруженија во земјата, со измените на законот, имаат обврска во рок од 90 дена да го усогласат својот назив согласно новите одредби. Ако не го сторат тоа, во крајна линија, им се заканува бришење од Централниот регистар.