Германскиот парламентарец Михаел Рот, пак, на средбите со шефот на дипломатија и со премиерот уверил оти силната поддршка на Германија на надворешно-политичките приоритети на земјава ќе продолжи и во иднина, а значаен фокус, како што беше наведено во владините соопштенија, ставил на парламентарната дипломатија како исклучително важен инструмент во продлабочувањето на севкупната билатерална соработка
Резолуцијата што германскиот Бундестаг ја усвои во јуни годинава, а со која се дава поддршка на македонскиот идентитет, јазик и култура на патот на С Македонија кон Европската Унија, е потврда за недвосмислената поддршка на земјава за приклучување кон ЕУ со сопствениот идентитет како дел од европскиот мозаик.
Ова, на одделните средби со германскиот пратеник Михаел Рот, кој е во посета на Скопје, денеска го истакнале премиерот Димитар Ковачевски и министерот за надворешни работи Бујар Османи. Тие се заблагодариле за усвоената резолуција и порачале дека како држава длабоко го цениме ваквиот потег.
„Резолуцијата од 15 јуни оваа година несомнено дека е од историска важност, навремена и неопходна да се разјаснат политичките дилеми кои постојат во внатрешнополитичката сцена во нашата земја, со цврсто уверување дека ние сме на прав пат кога се залагаме за уставни измени по 18 години макотрпна работа и влог на повеќе генерации кои треба да бидат крунисани со полноправно членство во ЕУ“,
кажал шефот на дипломатијата Бујар Османи за време на средбата со Рот.
Благодарност за резолуцијата што Бундестагот ја усвои за Северна Македонија била истакната и на средбата која Рот попладнево ја оствари со премиерот Димитар Ковачевски. Премиерот, како што беше соопштено во владиното соопштение, изразил огромна благодарност за долгогодишната поддршка што земјава ја добива од Германија и го поздравил усвојувањето на резолуцијата.
„Длабоко ја цениме резолуцијата на германскиот Бундестаг со којашто се потврдува недвосмислената поддршка на Северна Македонија за приклучување кон ЕУ со сопствен македонски идентитет, јазик, култура и историја како дел од европскиот мозаик“,
рекол Ковачевски на средбата со Рот.
Германскиот парламентарец Михаел Рот, пак, на средбите со Османи и Ковачевски уверил оти силната поддршка на Германија на надворешнополитичките приоритети на земјава ќе продолжи и во иднина, а значаен фокус, како што беше наведено во владините соопштенија, ставил на парламентарната дипломатија како исклучително важен инструмент во продлабочувањето на севкупната билатерална соработка.
На средбите со владините претставници, Рот потенцирал дека Германија гледа на С Македонија како неизоставен дел од ЕУ и како земја чии аспирации и напредок заслужено треба да бидат наградени со членство во Унијата.
Германскиот парламент (Бундестаг) во јуни годинава изгласа резолуција со која се дава поддршка на македонскиот идентитет, јазик и култура на патот на земјава кон членство во Европската Унија.