Вредноста е 700 милиони евра, со рок од седум години и со каматна стапка од 1,625%
Детали ќе соопшти министерот Фатмир Бесими утре на прес конференција
Министерството за финансии денеска објави дека е издадена осмата по ред еврообврзница, со што треба да се рефинансира еврообврзницата од 2014 година чија вредност е 500 милиони евра.
Според Министерството вредноста на најновата еврообврзница, за која детали ќе објави утре министерот за финансии Фатмир Бесими на прес-конференција, е од 700 милиони евра со рок од седум години и со каматна стапка од 1,625%. Нето-повлекувањето по основ на оваа еврообврзница е 200 милиони евра.
Земјава претходно има седум пати излезено на меѓународниот пазар на капитал со еврообврзници: во 2005 година со камата од 4,625%, во 2009 со камата од 9,875%, во 2014 со камата од 3,975%, во 2015 со камата од 4,875%, во 2015 година со камата од 5,625%, во 2018 година со камата 2,75% и 2020 со камата од 3,675%.
Еврообврзницата од 2014 година е во износ од 500 милиони евра и каматна стапка од 3,975%. По рефинансирањето, остатокот ќе се искористи за финансирање на дел од буџетскиот дефицит.