„Дежурни екипи синоќа го контролираа теренот со цел да не дојде до нови жаришта, особено на оние места каде пожарот веќе беше изгаснат“, вели градоначалникот Александар Китански
Сите доброволци што сакаат да учествуваат во гаснење на пожарот во Пехчево денеска да дојдат на плоштадот „Свети Петар и Павле“ и со себе да понесат лопати. Оттаму ќе бидат распоредени на критичните точки на пожарот.
Ова вчеравечер на својот фејсбук-профил го соопшти градоначалникот на Пехчево, Александар Китански, посочувајќи дека најстрого се забранува самоиницијативно одење да се гаси пожарот.
„Дежурни екипи синоќа го контролираа теренот со цел да не дојде до нови жаришта, особено на оние места каде пожарот веќе беше изгаснат“,
вели градоначалникот на Пехчево.
Пунктот за донирање на храна и вода, како што информираат од општината, е сместен во просториите на Домот на културата во Пехчево.
Од општината синоќа информираа дека е локализиран големиот пожар кој вчера избувна над пехчевското село Негрево.
Гасењето на пожарот траеше речиси два дена, откако синоќа се закануваше да го зафати Пехчево, поради што градот денеска цел ден беше мобилизиран.
Како што информираа од Центарот за управување со кризи (ЦУК), по еден хеликоптер од Србија и од Чешка, како и два „ертрактори“ од Германија ќе бидат вклучени во гаснењето на пожарите во земјава. Леталата пристигнуваат како меѓународна помош обезбедена со механизмот на ЕУ за цивилна заштита. Помош од три противпожарни возила најави и Унгарија.