Јанчева додаде дека Скопје е „заложник на урбана мафија која ја штити коалицијата на Мицкоски“ обвинувајќи ги дека ги продаваат јавните ресурси, ги загрозуваат урбанистичките стандарди и ги ставаат животите на граѓаните во опасност
Од ВМРО-ДПМНЕ велат дека Арсовска е активирана од СДСМ и ДУИ во предизборниот период откако „минатите години ги преспа и не направи ниту еден проект за граѓаните, ама направи за лица блиски до ДУИ и СДС“
ВМРО-ДПМНЕ и ВЛЕН го бранат криминалот на урбаната мафија во Чаир, обвини денеска Љубица Јанчева, советничка од СДСМ во Советот на Град Скопје.
Таа ја оцени коалицијата меѓу овие две партии како „коалиција на бизнис-интереси и бранење на криминал“, повикувајќи се на вчерашната седница на Советот на Град Скопје.
Јанчева рече дека советниците на ВМРО-ДПМНЕ самите ја свикале седницата и предложиле дискусија за дивоградбите во Скопје. Меѓутоа, кога сфатиле дека на дневен ред ќе дојдат и „скандалите во Чаир“, панично ја повлекле точката.
„Ваквото однесување е јасна потврда, ВМРО-ДПМНЕ и ВЛЕН се ставени во заштита на урбаната мафија која го загрозува Скопје и безбедноста на неговите граѓани“,
рече Јанчева на денешната прес-конференција.
Од СДСМ прашуваат: „Колку пари вреди молкот на советниците пред незаконското градење? Што крие Мицкоски, и кого штити Панче Тошковски кога молчи за ова?“
Јанчева додаде дека Скопје е заложник на урбана мафија која ја штити коалицијата на Мицкоски, обвинувајќи ги дека ги продаваат јавните ресурси, ги загрозуваат урбанистичките стандарди и ги ставаат животите на граѓаните во опасност.
„Колку пари се доволни за да се задоволат апетитите на Мицкоски, Ганиу и Меџити и да се престане со ставање на животите на граѓаните во опасност?“,
праша Јанчева.
СДСМ бара итна реакција на сите надлежни институции и целосно расчистување на скандалот со 150 дивоградби, потенцирајќи дека „одговорност мора да има“ и дека „животите на скопјани се поважни од профитите на коалицијата на власт“.
Како одговор на прес-конференцијата на СДСМ, ВМРО-ДПМНЕ излезе со своја реакција обвинувајќи ја градоначалничката Данела Арсовска дека го дестабилизира Скопје.
„Арсовска продолжува да тоне во безидејност бидејќи не се покажа на функцијата која што ја доби од граѓаните, па почна да прави театар низ главниот град“,
се вели во реакцијата на ВМРО-ДПМНЕ.
Тие тврдат дека театарот на Арсовска е по насока на нејзините коалициски партнери СДС и ДУИ, кои сè уште не можат да се помират дека се во опозиција и пробуваат да добијат што е можно поголема медиумска видливост.
Од ВМРО-ДПМНЕ велат дека Арсовска е активирана од СДСМ и ДУИ во предизборниот период, откако минатите години ги преспа и не направи ниту еден проект за граѓаните, ама направи за лица блиски до ДУИ и СДС.
„Тоа што таа му дала на синот на Блерим Беџети 12 илјади евра за интелектуални услуги, не го исчисти Скопје од ѓубрето во кое се давиме секојдневно. Циркузот на Арсовска е само од интерес на СДС и ДУИ. Скопјани го препознаваат тоа и затоа тие се во паника!“,
додаваат од ВМРО-ДПМНЕ.
Инаку, нетрпеливоста меѓу скопската градоначалничка Данела Арсовска и чаирскиот градоначалник Висар Ганиу, кој е кадар на владејачката ВЛЕН, почна да се развива откако Арсовска пред две недели изврши обиколка на неколку локации низ Чаир каде што се извршуваат градежни активности, за кои обвини дека се дивоградби.
Вчера во Советот на Град Скопје требаше да се одржи расправа за дивоградбите во Чаир и Сарај, но двете одделни седници, закажани на барање на советничките групи на СДСМ и ВМРО-ДПМНЕ, воопшто не се одржаа. Причината беше што мнозинството советници, предводени од ВМРО-ДПМНЕ, не го изгласаа дневниот ред.
По ова, Арсовска излезе на говорницата и ги обвини советниците на ВМРО-ДПМНЕ за, како што рече, „криминали и фалсификати“ на градоначалникот на Чаир, Висар Ганиу, што предизвика жестока расправија меѓу неа и советниците на ВМРО-ДПМНЕ, кои побараа од советникот Никола Пановски кој претседаваше со седницата, да ѝ го одземе зборот.
Денеска од опозициската Демократска унија за интеграција (ДУИ) рекоа дека незаконските активности на функционери на ВЛЕН и носители на раководни позиции во Владата и на локално ниво, за чиј „урбан криминал“ изминатиот период обвинува скопската градоначалничка Данела Арсовска, само потврдуваат дека ВМРО-ДПМНЕ ги создал и одбрал затоа што се подложни на уцени и под контрола преку отворени досиеја во Обвинителството, кое, како што велат од партијата, е под целосна контрола на власта.
Утрово, пак, градоначалничката на Скопје, Данела Арсовска, се огласи со нови обвинувања до градоначалникот на Чаир, Висар Ганиу, вицепремиерот и министер за животна средина и просторно планирање, Изет Меџити и раководителот на секторот за урбанизам во општина Чаир, Ејуп Адеми.
Арсовска тврди дека, според информациите што ги добила утрово, Ганиу, Меџити и Адеми планираат да го дестабилизираат Град Скопје, а прво на удар, како што вели, ќе биде Јавното сообраќајно претпријатие „Скопје“.
Од Основното јавно обвинителство (ОЈО) Скопје вчера соопштија дека е поведена истражна постапка против управител на фирма за бесправна изградба на шесткатница на улицата „Ќемал Сејфула“ во Општина Чаир.
Од Обвинителството информираат дека постапката е отпочната по претходна кривична пријава од група граѓани.