На онлајн состанокот меѓу лидерите на С Македонија, Србија и Албанија, освен позитивните искуства од иницијативата Отворен Балкан, станало збор и за заедничките позиции на трите држави за забрзување на имплементацијата на тековните иницијативи
Иницијативата Отворен Балкан e препознаена како позитивна регионална иницијатива која веќе дава конкретни резултати за компаниите и за граѓаните кога се во прашање европските слободи за движење на луѓе, услуги и стоки.
Ова било нагласено на денешниот координативен онлајн состанок меѓу премиерот Димитар Ковачевски, претседателот на Србија Александар Вучиќ и премиерот на Албанија, Еди Рама.
Ковачевски, Вучиќ и Рама нагласиле оти позитивните искуства од Отворен Балкан ќе ги пренесат на Самитот за Берлински процес кој се одржува на почетокот на ноември во германската престолнина.
„Од страна на лидерите беше посочено дека Отворен Балкан е иницијатива која ги мобилизира администрацијата, бизнисот и граѓаните за заеднички напредок на регионот и за заедничка поддршка за време на кризните состојби предизвикани од недостатокот на храна и струја“,
посочуваат од владината прес-служба.
На онлајн состанокот станало збор и за заедничките позиции на трите држави за забрзување на имплементацијата на тековните иницијативи.
Во меѓувреме, српскиот претседател Александар Вучиќ на Инстаграм објави дека на состанокот со Рама и Ковачевски било разговарано за заедничките чекори во насока на обезбедување сигурна зима за граѓаните на трите земји, како и за претстојниот Самит на Берлинскиот процес.
„Отворен Балкан значи мир, просперитет и посигурна иднина за народите од нашиот регион бидејќи заедно сме секогаш посилни“,
напиша Вучиќ на својот инстаграм-профил.