Илјадници луѓе упаднаа во складишта за хуманитарна помош во Газа за да земат брашно и основни хигиенски производи, објави Агенцијата на ОН за помош и работа со палестинските бегалци (УНРВА).
„Ова е загрижувачки знак дека граѓанскиот поредок почнува да се урива по три недели војна и тешка опсада на Газа. Луѓето се исплашени, фрустрирани и очајни,“
порача Томас Вајт, директорот на УНРВА во Газа.
Како што пренесува АП, УНРВА обезбедува основни услуги за стотици илјади луѓе во Газа. Нејзините училишта низ целата територија се трансформираа во преполни засолништа во кои се сместени Палестинците раселени поради конфликтот. Израел дозволи само мал дел од помошта да влезе од Египет, од која беше складирана во еден од магацините што беа провалени.
Во меѓувреме во Газа се стабилизираат телекомуникациите по речиси два дена тотален прекин. Израел го интензивира своето бомбардирање на територијата и започна голема копнена операција во која беа вклучени тенкови и војници.
Израелските одбранбени сили (ИДФ) соопштија дека борбени авиони бомбардираа повеќе од 450 цели во текот на изминатиот ден, вклучувајќи командни центри, набљудувачки пунктови и лансирни рампи за противтенковски ракети. Дел од медиумите објавија дека нападите биле во близина на најголемата болница во Газа, каде што според израелската армија Хамас има командно место под болницата.
Вчера израелскиот премиер Нетанјаху најави дека влегуваат во нова фаза од војната.
Израел ја бомбардира Газа од нападите на Хамас на 7 октомври во кои загинаа 1 400 луѓе, а 229 луѓе беа киднапирани како заложници. Министерството за здравство кое го раководи Хамас во Газа соопшти дека повеќе од 8 000 луѓе се убиени од почетокот на израелските одмазднички бомбардирања.