Илјадници Белгијци маршираа во Брисел на протестите поради новите рестриктивни антиковид-мерки
Ширум Европа започна да се шири нов бран на коронавирусот, а повеќето земји воведуваат построги епидемиолошки мерки, од задолжително носење мерки, забрани за собири, препораки за работа од дома до целосно затворање, како што е случајот во Австрија или Германија, која планира воведување задолжителна вакцинација токму по примерот на Австрија. Меѓутоа и натаму има земји како што е Велика Британија каде што моментално во сила се поблаги мерки.
Во европските земји расте и загриженоста од појавата на новата варијанта на ковид-19, омикрон, кој првпат е забележан во Јужна Африка. Меѓутоа, засега, делта сојот останува најраспротранета варијанта на ковид во Европа.
Данска забележа 183 случаи на заразени со омикрон
Данска денеска објави дека има вкупно 183 регистрирани случаи позитивни на варијантата омикрон. Оваа земја во петокот имаше само 18 потврдени случаи и 42 сомнителни на омикрон.
Вакцинацијата во оваа земја се препорачува за повозрасните од 18 години, бидејќи е утврдено дека опаѓа и имунитетот кај помладите. Барем до средината на декември за влез во ресторани, ноќни клубови и кафулиња ќе биде потребен задолжителен сертификат за вакцинација.
Белгијците протестираа во Брисел
Илјадници Белгијци маршираа во Брисел на протестите поради новите рестриктивни антиковид-мерки.
Извикувајќи „слобода, слобода“, луѓето протестираа пред зградата на ЕУ. Некои носеа транспаренти критикувајќи ги вакцините и воведувањето на задолжителна вакцинација. Протестите почнаа по најавата на премиерот Александар де Кроу, кој во петокот најави дека градинките и основните училишта ќе бидат затворени седум дена пред почетокот на божиќните празници, додека децата постари од шест години ќе треба да носат маски.
Премиерот изјави дека 40 отсто од креветите на интензивна нега се исполнети со пациенти заразени со коронавирусот. Ова е веќе трета недела со построги епидемиолошки мерки, а земјата веќе ги затвори ноќните клубови и побара од работниците ако имаат услови да работат од дома.
Австрија го продолжи „затворањето“
Десетици илјади Австријци на улиците го изразија своето незадоволство за време на третата недела од протестите против воведувањето на задолжителна вакцинација и други епидемиолошки мерки.
Властите соопштија дека се уапсени повеќе луѓе поради нарушување на јавниот ред и мир.
Австрија воведе целосно затворање на 22 ноември, кое е продолжено до 11 декември, поради назнаки дека мерките помагаат во намалување на бројот на новозаразени. Сега веќе поранешниот канцелар, Александар Шаленберг, неодамна најави дека вакцинацијата ќе биде задолжителна од 1 февруари.
Германија препорачува да не се патува за празниците
Германските власти им препорачаа на своите граѓани да останат дома за божиќните празници во период кога земјата се бори со ширењето на пандемијата со ковид-19. Канцеларката пак во заминување, Ангела Меркел, вчера повторно апелираше граѓаните да се вакцинираат.
„Вакцинирајте се, примете и засилувачка доза, вакцинацијата помага“,
порача Меркел.
Најновите мерки во Германија се однесуваат на невакцинираните, кои нема да можат да влезат ресторани, ниту да присуствуваат на спортски и културни настани. Постои можност парламентот да разгледува и воведување на задолжителна вакцинација. Во Германија се вакцинирани околу 68,9 отсто од луѓето, додека Владата се надева тој процент да се зголеми на 75 отсто.
Во Норвешка исто така се регистрира ширењето на сојот омикрон, Франција, пак, ги заострува условите за влез и излез од земјата за невакцинираните, додека Италија воведува задолжителна вакцинација за припадниците на војската и полицијата.