ОЈО Скопје сомничи 43-годишен тетовец кој по несреќата веднаш го напуштил местото без да им укаже помош на повредените и за него бара притвор, при што оценува дека постои опасност од бегство, можност да влијае врз сведоците и вештаците или да го повтори делото
Основното јавно обвинителство Скопје донесе наредба за спроведување истражна постапка против 43-годишен тетовец кој е осомничен дека на 7 март годинава, управувајќи товарно возило „Мерцедес“, по средната сообраќајна лента од автопатот „Мајка Тереза“, во близина на клучката Стенковец, не се придржувал кон прописите, го загрозил јавниот сообраќај и го довел во опасност животот на луѓето.
„Со предниот десен дел од возилото со кое управувал удрил во левиот страничен дел на товарно возило ‘ман’ со кумановски регистарски ознаки кое било запрено на десната сообраќајна лента наменета за принудно запирање поради дефект“,
соопшти ОЈО Скопје.
Според ОЈО, тој не ја приспособил брзината на движење на возилото спрема својствата и состојбата на патот, густината во сообраќајот и другите сообраќајни услови за да може навреме да запре.
„По ударот, запреното возило се придвижило нанапред и удрило во телото на едно оштетено лице кое стоело меѓу кабината и товарниот сандак и изведувало механичарски работи над товарното возило ‘ман’. Од ударот оштетениот добил тешки телесни повреди и починал на самото место, а со телесни повреди се здобиле и шоферот на запрениот камион и уште едно лице кое стоело во близина“,
велат од Обвинителството.
По несреќата, осомничениот веднаш го напуштил местото без да им укаже помош на повредените. Јавниот обвинител до судијата на претходна постапка достави предлог за определување мерка притвор за осомниченото лице оценувајќи дека постои опасност од бегство, можност да влијае врз сведоците и вештаците или да го повтори делото.
За осомничениот постои основано сомнение дека сторил кривично дело – тешки дела против безбедноста на луѓето и имотот во сообраќајот од член 300 став 2 во врска со член 297 став 1, како и кривично дело – неукажување помош на лице повредено во сообраќајна незгода од член 301 став 1 од Кривичниот законик.