Општина Охрид ќе ги послуша препораките на Антикорупциска во врска со тендерите во кои има судир на интереси, известија од кабинетот на градоначалникот на Охрид.
Ставот доаѓа откако во градската управа пристигнал допис од Државната комисија за спречување на корупцијата, во кој се бара општината да ги раскине сите договори за тендери кои ги има со фирмите на советникот Нефи Усеини од редовите на ДУИ.
„Службено лице во вршењето на својата функција, јавни овластувања или должности не може да воспостави деловни односи со правно лице кое е во негова сопственост или во сопственост на член на неговото семејство или во кое тој или член на неговото семејство поседува акции или удели или кое го основал тој или член на неговото семејство или во кое одговорното лице е член на неговото семејство. Имено, фирма што е во сопственост на лицето Нефи Усеини, или во сопственост на негови блиски лица, не може да воспостави деловни односи со Општина Охрид, каде истото лице е член на совет. Доколку, службеното лице постапи спротивно на овој член, на склучениот договор се применуваат одредбите за ништовност на договорот од Законот за облигационите односи.“,
стои во дописот на Антикорупциска.
Бизнис релациите на советникот Усеини влегоа во фокусот на јавноста откако негова фирма се пријави на тендерот за уривање на дивоградби во Охрид и тоа во период кога и самиот градеше и отвори негова пицерија за која нема дозвола, во заштитеното подрачје на градот.
Општината Охрид неколкупати најавуваше дека ќе се справи со објектот на Усеини, но до сега тоа не се случи. Сега, локалната власт, вели дека ќе ги почитува препораките на антикорупционерите.
„Во дописот пишува дека советник во советот на општината, во смисла на член 8 став 2 од Законот за спречување на корупцијата и судир на интереси има статус на службено лице и извршува јавни овластувања и должности, а во насока на член 51 став 1 од истиот Закон „Службено лице во вршењето на својата функција, јавни овластувања или должности не може да воспостави деловни односи со правно лице кое е во негова сопственост или во сопственост на член на неговото семејство или во кое тој или член на неговото семејство поседува акции или удели или кое го основал тој или член на неговото семејство или во кое одговорното лице е член на неговото семејство“. Врз однова на ова мислење од Државната комисија за спречување на корупција, Општина Охрид ќе постапи согласно сите Законски регулативи.“,
информираат од општината.
Според податоците од Бирото за јавни набавки, од промената на општинската власт, компанијата „Нефи ИК“ на советникот Нефи Усеини до сега има добиено 8 тендери со вкупна вредност од околу 225 илјади евра.
