Според ИЈЗ. минатата недела има 902 нови позитивни на вирусот, односно 7,8 отсто што е тренд на намалување во континуитет во однос на претходните недели кога се движеше од 10 отсто, 9,4 и 8,6 проценти
Минатата недела се регистирани повеќе оздравени, отколку нови позитивни случаи со ковид-19, а се намалува и бројот на смртни случаи, додека бројот на тестирања бележи тренд на зголемување, покажува статистиката на Институтот за јавно здравје, за периодот од од 10 до 16 август.
Според овие податоци, во оваа седмица направени се вкупно 11 605 тестирања, што е повеќе за 2 062 или 17,8 проценти споредено со претходната недела.
Од нив, нови позитивни на вирусот се 902 односно 7,8 отсто што е тренд на намалување во континуитет во однос на претходните недели кога се движеше од 10 отсто, 9,4 и 8,6 проценти.
Најголем дел од новите случаи се од Скопје (251 или 27,8 отсто) и Куманово (125 или 13,6 проценти). Во 18 градови во земјава, во наведениот период бројот на новопотврдени случаи е под 20.
Во однос на старосната структура, регистрирани се заболени лица во сите возрасни групи. Најзастапена е возрасната група на лица над 60 години, голем е бројот на заболени од 30 до 39 години, и од 50 до 59, додека најмалку регистрирани случаи има кај децата од 0 до 9 и од 10 до 19 години.
И вчера, повеќе оздравени од новозаболени
Вчерашниот биланс го потврдува овој тренд. Според податоците од Министерството за здравство, за 24 часа има нови 108 случаи на ковид-19, двајца починати и 112 оздравени.
Од новите случаи во Скопје се 45, во Куманово 18, во Дебар еден, во Штип 11, во Прилеп и Свети Николе по три, во Тетово, Струмица и Виница по два, во Струга, Делчево и Велес по четири, а во Гостивар девет.
Вкупниот број ковид дијагностицирани во земјава од почетокот на епидемијата е 13 076, оздравени се 9 625, починале 551 лице, а во моментов бројот на активни случаи е 2 900.
Комисијата за заразни болести вчера донесе нова мерка – се воведува задолжителен ПЦР тест за патниците од Косово кои минуваат низ земјава. Транзит-патниците ќе треба да покажат негативен ПЦР тест не постар од 72 часа.