Ковачевски информира дека во буџетот на Министерството за труд и социјална политика во 2023 година е предвиден трансфер од околу 30 милијарди денари кон Фондот за пензиско и инвалидско осигурување заради навремена исплата на пензиите и за усогласувањата предвидени со закон
Пензионерите утре на своите сметки ќе ја добијат втората исплата на финансиската поддршка од вкупно четири исплати кои се предвидени за пензионерите со пониски пензии од 14 илјади денари, кажа денеска премиерот Димитар Ковачевски по денешната средба со Сојузот на здружение на пензионерите на Македонија (СЗПМ) на која присуствуваше и министерката за труд и социјална политика, Јована Тренчевска.
Минатиот месец, како што посочи Ковачевски, со исплатата на декемвриската пензија финансиска поддршка од 1 500 денари добија 62 951 лице, чија пензија е до 11 525 денари и по 750 денари добија 65 704 лица, со износ на пензии од 11 526 до 14 000 денари.
„На почетокот на новата година се сретнав со раководството и со членовите на Сојузот на здруженијата на пензионерите на Македонија за да потврдиме дека партнерски продолжуваме да се грижиме за животниот стандард на пензионерите преку системски и одговорни политики, а не како во некои минати времиња кога пензионерите без злоупотребувани за предизборни цели“,
изјави Ковачевски.
Премиерот, меѓу другото, напомена и дека во март годинава ќе следува ново усогласување на пензиите според трошоците за живот и пораст од над просечната плата
„За една календарска година растот на пензиите ќе биде околу 16 проценти и тоа календарска година која не е изборна година“,
рече Ковачевски.
Тој информираше дека во буџетот на Министерството за труд и социјална политика во 2023 година предвиден е трансфер од околу 30 милијарди денари кон Фондот за пензиско и инвалидско осигурување заради навремена исплата на пензиите и за усогласувањата предвидени со закон.
Претседателката на Сојузот на здруженија на пензионерите на Македонија, Станка Трајкова по средбата изјави дека со новата методологија се постигна основната цел за пензионерите, а тоа е пензиите да се усогласуваат со дел од порастот на трошоците на животот и дел од порастот на платите, во еднаков процент.