Владата им препорачува на сите граѓани во државата, а особено на оние што живеат на подрачјата на општините Куманово, Прилеп и Тетово да го редуцираат излегувањето од своите домови и тоа да го прават само од најнеопходни причини
Oд 22 април (среда) населението на подрачјата на општините Куманово, Тетово и Прилеп нема да може да се движи без маска, шал, марама и сл. надвор од своите домови, на сите јавни места и површини од отворен и затворен тип, како и затворени простории, маркети, продавници или друго.
Ваква одлука донесе Владата на денешната седница, при што го задолжи Министерството за здравство да подготви и за наредната седница на Владата да достави уредба со законска сила во која правно ќе го нормира ова прашање, начинот на имплементирање, користење, потребната заштитна опрема, како и да се уреди прашањето на минимум задолжителната количина (резерва) што производителите на маски треба да ја имаат за потребите на државните институции.
Во уредбата треба да се предвиди дека обврската за носење на заштитна опрема ќе се применува на територијата на Република Северна Македонија, но по извесен период.
Владата на денешната седница одлучи да им се препорача на сите граѓани во државата, а особено на оние што живеат на подрачјата на општините Куманово, Прилеп и Тетово, согласно одлуките, мерките и препораките на Владата, да го редуцираат излегувањето од своите домови, тоа да го прават само од најнеопходни причини, односно заради одење на своите работни места. Се препорачува излегување од својот дом на само еден член од семејството заради купување на намирници и лекови од маркетите и аптеките.
Министерството за внатрешни работи треба во соработка со општинските штабови за заштита и спасување, најдоцна до 21 април (вторник), да подготви посебен оперативен план за присуство и дејствување на припадниците на полицијата во подрачјата на општините Куманово, Прилеп и Тетово, преку користење на засилени патроли и засилено присуство на полицијата, користење на мегафонска опрема од полициските возила на јавните места и површини, со цел контрола над почитувањето на одлуките, мерките и препораките донесени од Владата на Република Северна Македонија.
Исто така, дел од донациите на заштитна опрема кои земјава ги има добиено до овој момент, Министерството за здравство треба да ги даде на здравствените установи во општините Куманово, Прилеп и Тетово.