Од понеделник Србија со нови мерки – се отвораат трговските центри, децата се враќаат во училиште

Единствено остануваат затворени угостителските делови во трговските центри

Од понеделник, 12 април, во Србија ќе се отворат трговските центри, одлучи денеска Кризниот штаб, а услов е да продолжи моменталната тенденција на опаѓање на бројот на заразени во земјата.

Единствено остануваат затворени угостителските делови во трговските центри.

Донесена е одлука и за враќање на децата на физичка настава од 19 април.

Од почетокот на оваа недела стапија во сила нови, поблаги мерки, со тоа што се дозволи користење на отворените делови од угостителските објекти со капацитет од 50 проценти, со максимум пет лица на маса и растојание од два метра помеѓу масите.

Тие можат да работат до 22 часот, додека шалтерската продажба може да биде до 24 часа.

Србија од денеска со нови мерки: Се отвораат терасите на кафеаните, но не и трговските центри

Трговските центри и внатрешните делови од рестораните и баровите се затворени од 16 март поради влошената епидемиолошка состојба.

Според официјалните податоци од вчера, за 24 часа има 3 625 новозаразени и 41 смртен случај, додека во болниците се лекуваат околу 8 000 лица со компликации, од кои 265 се на респиратор, што е извесно намалување во споредба со минатата недела кога дневната бројка на новозаразени надминуваше 4 000.

Над два милиона веќе се вакцинирани, од кои повеќе од еден милион и со втората доза.