Од Синодот соопштија дека „независно од личните мислења на поединци и црковни портали, официјалните ставови на МПЦ-ОА се оние кои произлегуваат од портпаролот на Синодот и преку соопштенија од канцеларијата на Синодот“
„Тоа важи и за порталот ‘Литургија.мк’, како и за порталот на Бигорскиот манастир“, ни рече портпаролот на Синодот, г. Тимотеј
Од bigorski.org.mk сметаат дека станува збор за некакво недоразбирање зашто интернет-страницата „не е официјален портал на МПЦ-ОА, ниту, пак, некаде се претставува како таква, туку е локален манастирски сајт”. Од Литургија.мк ни рекоа да испратиме прашања на емаил, што и го сторивме, но одговори не добивме
Официјалните ставови на Македонската православна црква – Охридска aрхиепископија (МПЦ-ОА) се оние кои произлегуваат од портпаролот на Синодот, во случајот владиката Тимотеј, одговорен за Дебарско-кичевската епархија и преку соопштенија дадени од канцеларијата на Синодот.
Ваков став бил заземен од владиците на вчерашната седница на Синодот на МПЦ-ОА, со што, како што преку соопштение информираа оттаму, сметаат дека е потребно да ѝ појаснат на јавноста кои информации да ги смета како официјални ставови на Црквата.
„Синодот смета за потребно да појасни дека независно од личните мислења на поединци и црковни портали, официјалните ставови на МПЦ-ОА се оние кои произлегуваат од портпаролот на Синодот и преку соопштенија од канцеларијата на Синодот“,
се вели во соопштението испратено до медиумите по вчерашната синодска седница.
Иако Синодот во соопштението не посочува конкретно за кои црковни портали станува збор, неофицијално, реакцијата првенствено е предизвикана од серијата написи за црковни прашања со проруска содржина објавени на порталот „Литургија.мк“. Тој, пак, неодамна беше промовиран како официјален портал на МПЦ-ОА, каде свое интервју даде и архиепископот г.г. Стефан.
Г. Тимотеј: Реакцијата на Синодот важи за порталот „Литургија.мк“, како и за порталот на Бигорскиот манастир
„360 степени“ го побара владиката Тимотеј, кој е и портпарол на Синодот на МПЦ-ОА, за да го праша на кои црковни портали се однесува ваквата реакција на членовите на Синодот.
Г. Тимотеј ни рече дека тоа важи за сите црковни портали кои во јавноста пчасираат ставови што се прикажуваат како официјални ставови на МПЦ-ОА.
„Тоа важи и за порталот ‘Литургија.мк’, како и за порталот на Бигорскиот манастир“,
ни одговори г. Тимотеј.
„360 степени“ побара став од редакциите на порталите посочени во изјавата на г. Тимотеј – „Литургија.мк“ и на Бигорскиот манастир.
Од редакцијата на Бигорскиот манастир ни одговорија дека станува збор за некакво недоразбирање, затоа што, како што додаваат, интернет-страница не е официјален портал на МПЦ-ОА, ниту, пак, некаде се претставува како таква, туку е локален манастирски сајт.
„И секако, тоа што е главната идеја за постоењето на сајтот – да биде средство за евенгелизација на народот Божји, кон што укажуваат и објавените во него содржини. За нас како редакција и братство, особена сатисфакција е тоа што bigorski.org.mk е најчитаниот сајт во македонскиот духовен простор, но, според реакциите однадвор и сведоштвата што ни се пренесени од Албанија, Бугарија, Грција, Романија, Србија, па и многу пошироко, и најдобриот промотор за Православието на овие простори и за нашата Света Црква. Впрочем, нашата интернет страница, една од постарите со православна содржина кај нас, е средство и дел од мисијата на нашето монашко братство, коешто во 2025 година ќе слави 30 години од возобновата и исто толку години активна евангелска дејност. Затоа, сублимирајќи, според сè, навистина сметаме дека денешното соопштение од САС на МПЦ-ОА не се однесува на нашиот сајт, ниту терминолошки (бидејќи, рековме, ние не сме, ниту тежнееме да бидеме, официјален информативен портал на МПЦ-ОА), ниту суштински, со оглед на тоа што сме само еден локален манастирски сајт”,
велат од bigorski.org.k.
Од редакцијата на „Литургија.мк“, до објавување на овој текст, одговори не добивме, а прашањата ги упативме вчера.
Седиштето на „Литургија.мк“ во зградата на Архиепископијата во Скопје
Информативниот портал „Религија.мк“ во февруари годинава објави дека „Литургија.мк“ е нов интернет портал што МПЦ-ОА го регистрирала како црковен информативен портал.
„Во описот на активности на порталот пишува дека ќе известува за црковните и општествените настани во Македонија и светот, ќе објавува компетентни и врамнотежени анализи на црковните состојби, ќе поучува за христијанството во неговиот целосен теоретско-практичен опсег“,
напиша тогаш „Религија.мк“.
„Религија.мк“ објави и дека како регистрант на домеинот на „Литургија.мк“ се јавува МПЦ-ОА, а лице за контакт е архимандритот Иринеј Стефановски, кој порано беше дел од Православна охридска архиепископија (ПОА) на Јован Вранишковски, која, пак, во меѓувреме се реинтегрираше во МПЦ-ОА.
„Седиштето на порталот, според регистрацијата, е во зградата на Архиепископијата во Скопје. Домеинот е валиден од 21.12.2023 година, иако бил регистриран прв пат на 26.3.2021, а на 12.10.2021 биле извршени промени во регистрацијата“,
пишува „Религија.мк“.
Како што може да се види во импресумот на порталот, со него раководи Антониј Петрушевски, свештеник од Кумановско-осоговската епархија. Во редакцијата на порталот има претставници од сите епархии на МПЦ-ОА, од кои дел се свештеници, но има и лица што раководат со одредени хуманитарни организации кои се блиски до одредени епархии.
„360 степени“ го побара отец Петрушевки, раководител на „Литургија.мк“, за став околу изјавата на г. Тимотеј. Оттаму уште вчера ни беше кажано да испратиме прашања на емаил, но одговори не стигнаа.