Вратите во собраниската сала, како што посочуваат од кабинетот на Џафери, вчера биле затворени со цел собраниските служби да можат да го утврдат бројот на присутни пратеници, односно да се утврди дали постои кворум за да се премине кон гласање, а од тој аспект, додаваат, Деловникот дозволува можност за затворање на вратите на салата, на барање на претседателот на Собранието или на еден пратеник, поддржан од најмалку десет пратеници
По вчерашните тензии во Собранието, кога спикерот Талат Џафери нареди да се заклучат вратите на собраниската сала со цел пребројување на пратениците, а за што пратеничката група на ВМРО-ДПМНЕ бурно реагираше и рече дека ќе поднесе интерпелација на претседателот на Собранието, денеска кабинетот на Џафери истакна дека собранискиот спикер во ниту еден момент од вчерашната седница не го прекршил Деловникот.
„Сосема е јасно дека претседателот на Собранието во ниту еден момент не го прекрши Деловникот во текот на вчерашното продолжение на 71. седница, туку дека тоа, како и илјадници пати досега, го направи опозицијата, со своето недолично однесување, со цел да создаде хаос во законодавниот дом, служејќи се со слични методи како и на 27 април 2017 година“,
велат од кабинетот на Џафери.
Од кабинетот на собранискиот спикер додаваат оти намерата на опозицијата која, како што велат, сите овие години ја опструира работата на законодавниот дом и оневозможува донесување битни закони за граѓаните и овој пат е да создаде лажна претстава во јавноста дека претседателот на Собранието на Република Северна Македонија постапува спротивно на Деловникот.
Додаваат оти токму Деловникот ги демантира обвинувањата на опозицијата оти собранискиот претседател Џафери сторил нешто надвор од своите надлежности.
„Според членот 95 од Деловникот, Собранието може да одлучува ако на седницата присуствува мнозинство од вкупниот број пратеници. Собранието одлучува со мнозинство гласови од присутните пратеници, а најмалку со една третина од вкупниот број пратеници, ако со Уставот не е предвидено посебно мнозинство. Претседателот на Собранието го соопштува бројот на пратениците што гласале ‘за’, ‘против’ или ‘воздржано’, како и бројот на пратениците што се присутни. Претседателот на Собранието може да определи да се утврди бројот на присутните пратеници со броење. Утврдениот број на присутни пратеници се смета за точен сè додека претседателот или еден пратеник, чие барање го поддржуваат најмалку десет пратеници, не побара повторно да се утврди бројот на присутните пратеници“,
стои во реакцијата на кабинетот.
Според тоа, како што додаваат, вратите во собраниската сала вчера биле затворени со цел собраниските служби да можат да го утврдат бројот на присутни пратеници, односно да се утврди дали постои кворум за да се премине кон гласање.
„Со оглед на тоа што во салата со куполи, каде што во овој период се одржуваа пленарните седници нема соодветна опрема, се воспостави пракса координаторот да составува листа од присутни пратеници пријавени за збор“,
се наведува во соопштението.
Од тој аспект, се вели натаму, Деловникот дозволува можност за затворање на вратите на салата, на барање на претседателот на Собранието или на еден пратеник, поддржан од најмалку десет пратеници.
„Поточно, членот 97 од Деловникот на Собранието на Република Македонија предвидува дека за време на поименичното изјаснување на пратениците вратите на салата во која се одржува седницата на Собранието се затвораат и не се дозволува влегување и излегување на пратениците се додека трае поименичното изјаснување. Гласањето може да се врши и со поименично изјаснување на пратениците. Поименично изјаснување може да се врши заради точно утврдување на резултатот од гласањето, по барање на претседателот на Собранието или на еден пратеник чие барање го поддржуваат најмалку десет пратеници, само ако предлогот за кој се гласа добил до пет гласа повеќе или помалку од потребниот број гласови за негово донесување. Поименичното гласање се врши со изјаснување на секој прозиван пратеник со ‘за’ или ‘против’ предлогот или со воздржување од гласањето. Доколку пратеникот кога е повикан да гласа не е присутен во салата, не може дополнително да гласа. За време на поименичното изјаснување на пратениците вратите на салата во која се одржува седницата на Собранието се затвораат и не се дозволува влегување и излегување на пратениците се додека трае поименичното изјаснување“,
појаснуваат од Кабинетот на Џафери.
За одржување на редот на седницата, според членот 91 од Деловникот, додаваат, се грижи претседателот на Собранието, а за повреда на редот на седницата, претседателот може да го опомене и да му го одземе зборот на пратеникот.
Според тоа, потенцираат од кабинетот на Џафери, сосема е јасно дека претседателот на Собранието во ниту еден момент не го прекрши Деловникот во текот на вчерашното продолжение на 71. седница, туку дека тоа, како и илјадници пати досега, го направи опозицијата, со своето недолично однесување, со цел да создаде хаос во законодавниот дом, служејќи се со слични методи како и на 27 април 2017 година.
„Претседателот на Собранието нема да дозволи ВМРО-ДПМНЕ на таков начин да ја девалвира парламентарната демократија во земјава. Претседателот на Собранието досега и во иднина ќе продолжи да работи согласно Деловникот, Уставот и законите, во интерес на граѓаните“,
наведуваат од кабинетот на Џафери.