Исклучок ќе бидат здравствените работници – лекари и медицински персонал, како и кадри од областа на високото образование
Од наредниот месец треба да почне процесот за донесување нов закон за пензионирање според кој во пензија ќе мора задолжително да одат сите лица со навршени 64 години. Исклучок од ова ќе бидат здравствените работници – лекари и медицински персонал, како и кадри од областа на високото образование.
Законот треба да почне да се применува од јануари наредната година, најави денеска премиерот Зоран Заев за време на посетата на Стопанската комора. Според податоците што ги добил од МИОА, во моментов има околу 10 300 лица кои се на возраст над 64 години, а сѐ уште се во работен однос во јавниот сектор.
„На овој начин ќе отвориме простор за младите и перспективни кадри кои навистина ќе може да движат напред. Законот е замислен да биде задолжително пензионирањето на 64 години, односно 62 години за жените флексибилно, освен за вработените во здравство, лекари и медицински персонал и за високото образование. Секако, ова ќе помине во консултации со синдикатите и коморите, да видиме што правиме со одредени дефицитарни струки за да не се создаде недостиг на кадри“,
рече Заев.
Тој истакна дека пензискиот систем е стабилен и оти може да се спроведе планираното.
„Овој процес ќе биде отворен од септември, да има конечна примена од 1 јануари, а конечната цел е да се даде шанса на младите кадри и тоа не само за јавната администрација туку и за приватниот сектор. Ова, исто така, ќе овозможи и да се намали јавната администрација и да се подобри квалитетот на работата“,
рече премиерот Заев.
Дефицитарни кадри и натаму ќе можат да се ангажираат, исто како што ќе може да се ангажираат и искусни советници доколку е тоа потребно.