Каталонија од денеска е првата шпанска покраина која воведува задолжително носење заштитни маски на јавно место, во сите услови и за сите жители и посетители.
Одлуката ја објави премиерот на Каталонија, Ким Тора, четири дена откако 200 000 луѓе во областа на Сегрија се ставени во карантин поради неколку нови жаришта на коронавирус.
„Маските ќе бидат задолжителни во цела Каталонија, не само во Сегрија. Мислам дека е важна мерка“,
рече Тора, додавајќи дека властите ќе дистрибуираат заштитна опрема.
Минатиот месец шпанските власти воведоа обврска за носење маска во затворен простор и на отворено кога не е можно растојание од 1,5 метар или додека не се најде вакцина или лек за коронавирусот.
Каталонија ја отстрани одредбата со растојанието, така што носењето маски е задолжително за сите ситуации.