Оваа одлука, вели премиерот Ковачевски, има за цел да го спречи растот на цените на одредени прехранбени производи, да се одржи континуитет во снабдувањето со вода, како и да се обезбеди електрична енергија за училиштата за непречено одвивање на наставата во текот на претстојниот период. Одлуката ќе трае се до крајот на кризната состојба, односно до 30 април 2023 година
Склучувањето на договорите за снабдување со електрична енергија од ЕСМ, како што посочи премиерот, можат да се склучат секој први во месецот – 1 декември 2022, 1 јануари, 1 февруари, 1 март и 1 април 2023
Од денеска физички и правни лица регистрирани за вршење на дејност од областа на прехранбената индустрија, јавните претпријатија од областа на водостопанство, како и основните и средни јавни училишта ќе можат да склучуваат договори со ЕСМ за снабдување со електрична енергија, информира денеска премиерот Димитар Ковачевски.
Оваа одлука, вели премиерот, има за цел да го спречи растот на цените на одредени прехранбени производи, да се одржи континуитет во снабдувањето со вода, како и да се обезбеди електрична енергија за училиштата за непречено одвивање на наставата во текот на претстојниот период.
„Пред седум дена со владина одлука обезбедивме непречено и по стабилни цени, снабдување со електрична енергија во услови на криза, за функционирање на виталните институции на државата, како и поевтина струја за компаниите за стабилизирање на цените на прехранбените производи. Во таа насока, Владата на донесе одлука со која го задолжи АД ЕСМ преку ‘ЕСМ продажба’ во текот на траењето на енергетската криза, до 30 април 2023 година, да снабдува со електрична енергија неколку категории потрошувачи, дополнително од досегашното задолжение кое што го има според Закон“,
кажа премиерот.
Во мерката се опфатени три категории на потрошувачи:
Прва категорија – физички и правни лица регистрирани за вршење на приоритетна дејност од областа на прехранбената индустрија
Во оваа категорија, посочи премиерот, спаѓаат правни лица кои се регистрирани за вршење дејност од областа на прехранбената индустрија, а тука се основните продукти како месо, млеко, леб, масла итн.
За нив цената на електричната енергија ќе биде 80 евра за мегават-час и ќе важи само за потрошувачката на броилата за извршување директно на приоритетната дејност, значи исклучиво во производниот процес. Целта е, додаде Ковачевски, да се одржи стабилна цената на основните прехранбени производи, односно да не дојде до раст на нивните цени предизвикани од исклучително високите сметки за струја или прекин на производството.
„Но, тука сакам да го реафирмирам истото што беше договорено со претставниците на стопанските комори од секторите кои се од прехранбената индустрија на основни прехранбени производи сите да бидат солидарни и како што некои веќе и најавија цените на основните прехранбени продукти кои се опфатени со оваа мерка да се намалат, најмалку за 10 проценти“,
истакна Ковачевски.
Втора категорија – јавни претпријатија од областа на водостопанство, собирање и одведување на урбани отпадни води и прочистување на отпадни води кои работат со пумпни или пречистителни станици
Цената на електричната енергија за овие претпријатија ќе биде 95 евра за мегават-час. Целта на префрлањето на овие претпријатија на „ЕСМ продажба“, посочи Ковачевски, е тоа што струјата за нив е клучна за функционирањето на пумпите и пречистителните станици.
„Не смее да се дозволи поради високата цена или следствено исклучување поради ненадоместени сметки да дојде до тоа пумпите да останат без струја и да се загрози водоснабдувањето или одведувањето и прочистувањето на водите“,
вели премиерот.
Трета категорија – основни и средни јавни училишта
„За да имаме топли училишта и топли болници во оваа кризна состојба Владата со одлука обезбеди за 365 основни и 109 средни училишта како и за здравствените установи повластена цена на струја од ЕСМ од 95 евра за мегават-час. Целта на снабдувањето на училиштата е да се осигура настава, односно дека нема да дојде до нарушување на воспитно-образовниот процес од причини недостиг на струја, исклучување поради неподмирени високи сметки итн. поврзани со електричната енергија“,
нагласи премиерот.
Ковачевски додаде дека од страна на ЕСМ е подготвена потребната документација врз основа на која ќе се склучуваат договорите за снабдување со струја, а дека истите ќе бидат објавени на веб-страницата на компанијата заедно со другите документи кои треба да се приложат кон барањето.
Склучувањето на договорите за снабдување со електрична енергија од ЕСМ, како што посочи премиерот, можат да се склучат секој први во месецот – 1 декември 2022, 1 јануари, 1 февруари, 1 март и 1 април 2023.
„За да почнат да се снабдуваат со електрична енергија од први во наредниот месец, сите заинтересирани потребно е најдоцна до десетти (10) во тековниот месец да го достават до ‘ЕСМ продажба’ потпишаниот договор со потребната документација. На пример, овие следни два дена што се пред нас, денес и утре, до 10 ноевмри треба да се поднесат документите за да почне снабдувањето од 1 декември оваа година. Овој рок не важи само за корисниците кои во моментот се на снабдувач во краен случај, за нив рокот е до дваесетти (20) во тековниот месец“,
посочи Ковачевски.
Меѓу другото, премиерот кажа дека државата ќе продолжи да ја субвенционира струјата со 80 отсто за над 600 000 домаќинства и 72 000 мали потрошувачи – фирми кои вработуваат 98 проценти од работниците во државата.