Од државите во регионот, на „црната листа“ на италијанското Министерство за здравство се најде и БиХ
Италија од денеска забранува влез на нејзина територија од 13 земји за кои процени дека имаат многу случаи на ковид-19.
На списокот, составен од италијанското Министерство за здравство, се Ерменија, Бахреин, Бангладеш, Бразил, Босна и Херцеговина, Чиле, Кувајт, Северна Македонија, Молдавија, Оман, Панама, Перу и Доминиканската Република, пренесува МИА.
„Забраната се однесува на сите што престојувале во тие земји или поминале низ нив во изминатите 14 дена“,
изјави министерот за здравство Роберто Сперанца.
Патници од сите други земји надвор од Европската Унија и шенген-зоната можат да влезат во Италија, но по пристигнувањето тие мора да поминат 14 дена во карантин.
„Пандемијата е во најостра фаза низ целиот свет“,
рече Сперанца.
На почетокот на пандемијата на ковид-19 во Европа, Италија беше меѓу најпогодените земји.