Покрај усогласувањето со новото уставно име, законските измени предвидуваат и усогласување со Законот за употреба на јазиците
Од 1 јули оваа година ќе почне да се издаваат патни исправи со новото уставно име на државата – Република Северна Македонија.
Актуелните патни исправи на кои пишува „Република Македонија“ и оние кои ќе се издадат до 1 јули, ќе важат до истекот на нивниот рок на важење, но најдоцна до 12 февруари 2024 година.
Ова се дел од измените на Законот за патните исправи на државјаните на РСМ, кој денеска помина во прво читање на седница на собраниската Комисија за политички системи и односи меѓу заедниците.
Покрај усогласувањето со новото уставно име, законските измени предвидуваат и усогласување со Законот за употреба на јазиците. Се предвидува обрасците на патните исправи за оние граѓани кои зборуваат на јазик што го зборуваат најмалку 20% од населението, во случајот албанскиот, да се печатат и на албански јазик.
„На граѓаните од ставот 4 на овој член, на нивно лично барање, податоците кои се внесуваат во патната исправа се запишуваат и на јазикот и писмото што го употребува граѓанинот. На граѓаните од ставот 4 на овој член, на нивно лично барање податоците за личното име што се внесуваат во патната исправа се запишуваат и на јазикот и писмото што го употребува граѓанинот“,
пишува во предлог-законските измени.
