„Кусурот на Груевски, познат под прекарот Џуџето од Небрегово, а јавноста го памети по аферите поврзани со АМСМ и семејните бизниси од Кичево, изгледа се уште нема навика да одговара пред граѓаните што го избрале“, нашиша министерот за правда, коментирајќи ја изјавата на пратеникот од ВМРО-ДПМНЕ и потпретседател на Собранието
Уште откако се повлече од функцијата министер за надворешни работи, како пратеник, активно учествуваше во креирањето на канцерогениот правосуден систем. Беше вклучен и во донесувањето на штетните измени во Кривичниот законик во 2023 година, со што се спаси од одговорност за кривичното дело „Моќник“. Ова е синоќешната реакцијата на министерот за правда Игор Филков, која ја објави на неговиот фејсбук-профил откако вчеравечер пратеникот од ВМРО-ДПМНЕ Антонијо Милошоски, во гостување на ТВ Телма, изнесувајќи личен став, рече дека министерот има слаби перформанси, во однос на обврските што ги има преземено за реформите во правосудството.
„Кусурот на Груевски, познат под прекарот Џуџето од Небрегово, а јавноста го памети по аферите поврзани со АМСМ и семејните бизниси од Кичево, изгледа се уште нема навика да одговара пред граѓаните што го избрале. Бидејќи очигледно е неинформиран и изолиран од партијата, го упатувам во неговата матична партија, или, пак, во Владата, можеби конечно ќе го известат за постапките, роковите и статусот на законите“,
вели Филков.
Според него, Милошоски личи како некој што работи по туѓи наредби, па го постави прашањето за кого во моментов одработува, дали за интересите на граѓаните или за некои други агенди.
„Во минатото е познат Ванчо Михајлистички ставови, многу лаги и невистини. Ова е лош дефокус на македонската јавност по двонеделниот одмор“,
напиша министерот.
Во продолжение, Филков, посочува 16 законски решенија, за кои вели дека се подготвени, исто како и десетици други што се во процедура, како дел од реформите во правосудниот систем.
Пратеникот од ВМРО-ДПМНЕ Антонијо Милошоски, оценувајќи ја работата на министерот Игор Филков, кој е од редовите на владиниот партнер на ВМРО-ДПМНЕ партијата ЗНАМ – „За Наша Македонија“, рече дека тој има слаби перформанси во однос на обврските коишто ги има преземено за реформите во правосудството.
„Очекував досега барем во нацрт-верзија до Собранието да бидат доставени законот за судовите, законот за судскиот буџет, законот за јавнообвинителската служба, новиот Кривичен законик“,
рече Милошоски.
Критиката на Милошоски кон Филков доаѓа еден ден откако министерот за здравство и лидер на Алијанса за Албанците, дел од владината коалиција „Вреди“, Арбен Таравари, во интервју за „360 степени“ изјави дека од 100 километри се гледа неусогласеноста на „Вреди“ во владината коалиција.