За ситуацијата на истокот на земјата, денеска од украинското Министерство за одбрана рекоа дека борбите се со максимален интензитет бидејќи руските сили ги напаѓаат украинските позиции во неколку области истовремено
Ситуацијата на истокот на Украина е полоша отколку што си мислат луѓето, порача украинскиот министер за надворешни работи Дмитро Кулеба.
Изјавите на Кулеба доаѓаат во период кога Русија прави се поголем притисок во регионот на Донбас за да ги освои градовите Северодонецк и Лисичанск.
Одговарајќи на прашања доставени на Твитер, Кулеба порачува и дека на Украина очајно ѝ е потребно оружје за да се бори против Русите.
„Без артилерија, без повеќекратни ракетни системи за лансирање нема да можеме да ги одвратиме. Ако навистина се грижите за Украина, ако сакате Украина да ги деокупира нејзините територии, испратете ни повеќе ракетни системи за лансирање што е можно поскоро“,
вели Кулеба.
За ситуацијата на истокот на земјата, денеска од украинското Министерство за одбрана рекоа дека борбите се со максимален интензитет бидејќи руските сили ги напаѓаат украинските позиции во неколку области истовремено.
Имаше гранатирања во повеќе места, а според последните извештаи, вкупниот биланс на загинати цивили се искачи на 14.
Во североисточниот град Харков, како што објави началникот на националната полиција Ихор Клименко, вкупниот број на загинати во денешните напади изнесува осум.
Четворица цивили, пак, се убиени во источниот регион Донецк, изјавил регионалниот гувернер, пренесува Би-би-си.
Според регионалната воена команда, двајца загинати цивили има и во јужниот регион Миколајев каде од гранатирањата била оштетена и цивилна инфраструктура вклучувајќи продавници и станбени згради.
Photo: EPA-EFE/OLIVIER HOSLET