И новите девет аудио снимки кои вчера се појавија на каналот „U6e Big“ на Јутјуб се дел од истрагата која викендов ја отвори Државното обвинителство за претходните седум снимки, во кои наводно се слуша гласот на бизнисменот Орце Камчев и неколкумина соговорници.
„Се постапува по предметот. Издадена е наредба до Министерството за внатрешни работи – Сектор за компјутерски криминал и дигитална форензика да преземат дејствија и мерки и барањето за прибирање на потребни известувања да го достават до „Јутјуб““, соопштуваат од Јавното обвинителство.
Во моментов се испитуваат сите околности во врска со идентификација на лицето што ги објавило снимките.
„Со постапката треба да се утврди кој снимал, дали во содржината на разговорите и нивното јавно објавување има елементи на кривично дело, како и идентитетот на лицата што разговараат. Откако ќе биде прибран и анализиран доказниот материјал, обвинителството ќе донесе одлука дали и кое лице ќе биде повикано да даде исказ пред обвинител, за што во моментот е прерано да се зборува“, се додава во соопштението.
Основното јавно обвинителство за гонење на организиран криминал и корупција воедно информира дека до сега до него нема пристигнато пријава која се однесува на објавените снимени разговори.
Русковска за снимките
Шефицата на Обвинителството за гонење организиран криминал и корупција која го води и случајот „Рекет“, Вилма Русковска за Дојче веле ги коментира снимките, а кои, како што се таа се изјасни претходно, не се дел од доказниот материјал со кој располага Обвинителството за овој случај.
Во еден од разговорите објавени вчера, наводно бизнисменот Орце Камчев, за кој се верува е на снимките на соговорник му кажува дека во торбата која им ја предл на Бојан Јовановски и Зоран Милески со еден милион евра имало ГПС („во рачката, во металното“),врз основа на што, Камчев заклучува дека „куферот не е кај Заев”.
Русковска вели дека такво нешто досега не е споменати во исказите на сведокот.
„Не верувам дека имало ГПС. Сведокот досега не споменал такво нешто, ниту во записникот за примање на кривичната пријава, ниту во исказот даден во текот на истражната постапка, ниту пак во сведочењето на главната расправа“, вели Русковска за Дојче веле.
Исто така, Русковска вели дека е убедена дека видео и аудио материјалите кои се појавија во италијанскиот весник „Ла Верита“ се протечени од Обвинителството, како што кажува Камчев во новите снимки.
„Не верувам дека некоја обвинителка ги земала снимките и ги дала на Мицкоски. Сигурна сум дека не излегле од кај нас, пред се, поради внатрешните процедури и начинот на кој беа чувани. И фактот дека беа во заклучена просторија ја елиминира таквата можност“, вели обвинителката, која исто така смета дека ниту трвдењата на лицето на снимките дека на истражител дал 100.000 евра за „стикче“, не се однесува на обинители од Обвинителството што го води.
„Не може да се однесува за нашите истражители, бидејќи во овој случај Камчев ги даваше материјалите. Нема логика да ги бара и да плаќа за нив. Тој е сведок. Друго е да се води постапка против него, па да сака да знае кои сведоци се сослушани и што кажале тие. Но во овој случај тој ги даде материјалите, тој знае што има во нив“, вели обвинителката Русковска за Дојче веле.