Според досегашните сознанија, браќата Олдаши биле киднапирани, а потоа убиени со по два куршуми во пределот на главата испукани од пиштол „застава“
Обвинителството во Корча, Албанија, испратило допис до македонското Министерство за правда со цел соработка за расветлување на двојно убиство.
Како што јавија албанските медиуми, станува збор за убиството на браќата Мартин и Андреа Олдаши кое се случило во декември 2020 година во селото Шќитас, општина Малиќ. Според истрагата, откако двајцата браќа биле егзекутирани, нивните тела биле фрлени во канал за наводнување.
„Обвинистелството испрати допис до Министерството за правда на Северна Македонија, во врска со проверката на лицето Фламур Даути, уапсено за дрога во село кај Прилеп, во оваа земја. Поточно, од тамошните власти се бара да се дозволи испрашување на затвореникот Даути, со кого жртвите имале контакт. Позитивниот одговор од македонските власти би ѝ помогнал на правдата во истрагата за двојното убиство, за кое сè уште нема сторители“,
пренесуваат албанските медиуми.
Според досегашните сознанија, браќата Олдаши биле киднапирани, а потоа убиени со по два куршуми во пределот на главата испукани од пиштол „застава“.
„Преку оперативни сознанија се дознава дека двајцата браќа Мартин и Андреа Олдаши се занимавале со криминални активности од областа на наркотици, лихварство, кражби и уништување имот со експлозивни средства, како и помагање при нелегално преминување на границата. Постојат основи на сомненија дека убиените и Даути заедно соработувале во шверц на дрога“,
посочуваат тамошните медиуми.
Даути со 53 килограми марихуана, која ја внел од Албанија, бил уапсен од македонската полиција вечерта, на 8 декември 2020 година кога, како што е потврдено од обдукцијата, во Албанија биле убиени браќата Олдаши.