Во однос на информациите изнесени од ВМРО-ДПМНЕ дека полицајци, началници и функционери во Прилеп се организирале за да заплашуваат политички противници на денот на изборите, од Јавното обвинителство на Република Северна Македонија велат дека наводите се проверуваат. По нив постапува Комисијата за следење на изборни нерегуларности.
„До надлежното Основно јавно обвинителство се доставени наводите со насоки тие да се проверат и доколку се утврдат елементи на сторени кривични дела, да се постапи согласно законските надлежности“,
велат од Обвинителството и ја потсетуваат јавноста дека во функција е електронската адреса izbori@jorm.mk на која можат да пријават сомнение за сторено кривично дело поврзано со изборите и гласањето.
Од Министерството за внатрешни работи денеска категорично ги отфрлија, како што велат во соопштението, невистините кои втор ден по ред ги шири партијата ВМРО-ДПМНЕ за наводно „координирано следење, малтретирање и селективно попречување на слободата на луѓе”.
„На денот на изборите, 17 октомври, во Прилеп нема испратено возило на технички преглед, ниту пак, е изречена санкција за сообраќаен прекршок, што говори дека наведените дејствија, всушност, не се случиле. МВР почна внатрешна истрага за утврдување на фактите, имајќи предвид дека вибер-групи или графички прикази од вибер-групи може да се креираат и изработат во секое време и од секого, и имајќи предвид дека до МВР не е пристигната ниту една пријава од граѓанин за дејствија во Прилеп на денот на изборите какви што беа презентирани на прес – конференцијата. МВР е гарант за сите слободни избори од 2017 до денес и тоа ќе продолжи да биде и понатаму“,
се наведува во соопштението од МВР.