Основното јавно обвинителство – Скопје, кое постапуваше по допрен глас за незаконско согорување медицински отпад на депонијата „Дрисла-Скопје“ ДОО Батинци, заклучило дека не постојат докази што упатуваат на сомнение дека е сторено кривично дело што се гони по службена должност и донесе одлука дека нема место за јавнообвинителско постапување во предметот, соопшти денеска ОЈО Скопје.
„Врз основа на прибраните обемни податоци и релевантни докази, а особено од извршените тестирања и анализи, не произлезе дека од депонијата ‘Дрисла-Скопје’ ДОО Батинци, спротивно на прописите за заштита на животната средина, биле испуштани отровни или издувни гасови во поголемо количество со кои би се предизвикало значително оштетување на квалитетот на воздухот и опасност за животот и здравјето на луѓето, како и уништување на животинскиот и растителниот свет“,
се вели во соопштението.
Од Обвинителството објаснуваат дека за утврдување на фактичката состојба спроведена е обемна предистражна постапка во рамките на која биле прибрани податоци и извештаи кои се однесуваат на еколошките дозволи што ги поседува депонијата и на резултатите од редовните, контролните и вонредните инспекциски надзори извршени во текот на 2017 и 2018 година. Во исто време бил сослушан и претставник на Државниот инспекторат за животна средина кој ги појаснил наводите и ги потврдил констатираните состојби при извршените инспекциски надзори.
Дополнително, на 25.2.2019 година бил формиран и тим со истражители од Царинската управа и од Управата за финансиска полиција кои презеле дејствија за проверка на сомнежите пласирани во јавноста во врска со незаконит увоз и согорување медицински отпад во „Дрисла-Скопје“ ДОО Батинци.
Анализата на прибраните извештаи покажала дека при вонреден инспекциски надзор од Државниот инспекторат за животна средина на 1.12.2017 година било констатирано дека просечните концентрации на емитуваните CO, SO2 и прашина од работењето на инсинераторот на печката за спалување медицински отпад ги надминуваат граничните вредности согласно со Правилникот за гранични вредности на емисии при согорување отпад и услови и начинот на работа на инсталациите за горење и согорување. По ова, Инспекторатот донел решение со кое го ограничило работењето на инсинераторот за спалување медицински отпад на најмногу осум часа во текот на еден работен ден и целосно го забранил работењето во деновите кога се надминати праговите за алармирање на загадувачки супстанции во амбиентниот воздух во Скопје. Со спогодба правниот субјект бил задолжен да плати одмерена глоба во износ од 8.500 евра. Во исто време депонијата била задолжена во рок од 90 дена да ги доведе емисиите на загадувачки супстанции во воздухот во дозволените граници.
По овој настан, како што се наведува во соопштението, во текот на 2018 година, депонијата набавила нови филтри и направила измени на инсинераторот за медицински отпад, а при извршените контроли од инспекторатот било констатирано дека емисијата на загадувачки супстанции во воздухот не ги надминува граничните вредности определени со Правилникот.
На 22 јануари 2019 година депонијата ги известила Државниот инспекторат за животна средина и Министерството за животна средина и просторно планирање дека печката за согорување медицински и друг вид опасен отпад е ставена надвор од употреба поради дефект и физички оштетувања на филтерот за прочистување издувни гасови. Дефектот бил отстранет во февруари 2019 година, а извршеното тестирање покажало дека емисијата на загадувачки супстанции во воздухот не ги надминува граничните вредности, по што печката повторно била ставена во употреба. Во меѓувреме, медицинскиот отпад се собирал и складирал во депонијата, но не се согорувал.
Во периодот од 22 ноември 2018 до 7 март 2019 година Факултетот за информатички науки и компјутерско инженерство поставил мерен инструмент „AIRPOINTER-Recordum“ во кругот на депонијата „Дрисла“ со цел да мери и да собира податоци за квалитетот на воздухот во близина на печката каде што се согорува медицински отпад. Од извештајот од мерењата се констатира дека во најголем дел резултатите од мерењето се во дозволените граници, а во периодите кога има надминување тоа е со краток максимум од 70 до 80 микрограми на метар кубен, што е во рамки на европскиот просек за урбани средини.
Јавниот обвинител ги обезбедил и резултатите од извршените мерења и анализи на технолошката вода и на водата за пиење во депонијата „Дрисла“, извршени од ЈЗУ Центар за јавно здравје, кои исто така се во рамките на законските и стручните прописи во однос на испитаните параметри.
Врз основа на сите овие податоци и анализи ОЈО Скопје донел резолуција дека нема место за јавнообвинителска интервенција во предметот.
