Од Обвинителството потврдија дека обвинетиот Мијалков во попладневните часови се јавил таму и притоа му е врачено решение за определена мерка куќен притвор
Основното јавно обвинителство за гонење организиран криминал и корупција ја повлекло жалбата што ја поднесе до Апелација, а со која бараше, наместо куќен, на Мијалков да му се определи притвор кој ќе го издржува во затвор.
Ваквата информација доаѓа откако попладнево Мијалков сам се појави во Обвинителството за да си го подигне решението за куќен притвор. Според информациите, тој е сѐ уште во Обвинителството.
Во моментов пред Обвинителството за гонење организиран криминал и корупција има многубројни новинарски екипи.
Од ова Обвинителство потврдија дека дека обвинетиот Мијалков во попладневните часови се јавил таму и притоа му е врачено решение за определена мерка куќен притвор.
„Пред два дена, како резултат на оперативни сознанија кои укажуваа на можност од бегство, на предлог на Основното јавно обвинителство за гонење организиран криминал и корупција, Основниот кривичен суд – Скопје, со решение, на обвинетиот Сашо Мијалков му определи мерка куќен притвор и 24-часовен видео и аудионадзор. До денес обвинетиот беше недостапен за органите на прогонот“,
се наведува во соопштението од Обвинителството за организиран криминал.
Мијалков беше недостапен од неделата попладне, но ТВ 24 доцна попладнево објави негова видеоизјава, при влегувањето во Обвинителството, во која тој вели дека имал температура и се изолирал, па затоа не можеле да го најдат. Таквата информација досега не споделија надлежните, ако се земе предвид дека во полициска станица на распит беа повикани десетина лица блиски на Мијалков, членови на неговото семејство и на обезбедувањето.